आईसीसी टी-ट्वेन्टी विश्वकप : पहिलो खेलमा नेपाल ६ विकेटले पराजित

डालास । नेपालले हारबाट आईसीसी टी-ट्वेन्टी विश्वकप २०२४ को सुरुआत गरेको छ । अमेरिकाको ग्रान्ड प्रेरी क्रिकेट रंगशालामा नेपाल नेदरल्यान्ड्सँग ६ विकेटले पराजित भएको हो । नेदरल्यान्ड्सले टस जितेर पहिले फिल्डिङ रोजेपछि ब्याटिङमा उत्रिएको नेपालले एक सय ७ रनको लक्ष्य प्रस्तुत गरेको थियो । जवाफमा नेदरल्यान्ड्सले १८ ओभर चार बलमा चार विकेट गुमाएर एक सय ७ रनको लक्ष्य पूरा गर्यो ।

नेपालले १९ ओभर दुई बलमा सबै विकेट गुमाएर एक सय ६ रन मात्र बनाएको थियो । नेपाल र नेदरल्यान्ड्सबीचको खेल पनि लो स्कोरिङ खेल हुन पुग्यो । दुवै ओभरमा बलर हाबी भएका थिए । नेपालका ओपनर आसिफ सेख चार रन बनाएर आउट भएका थिए । उनलाई नेदरल्यान्ड्सका टिम प्रिन्ग्लेले एक ओभर ६ बलमै आउट गराएका हुन् । आसिफ आउट हुँदा नेपालले १० रन मात्र बनाएको थियो । नेदरल्यान्ड्सले नेपालविरुद्ध सुरुआतबाटै कसिलो र घातक बलिङ गरेको थियो । यसकारण पनि नेपालले दुवै ओपनरलाई सहजै गुमायो ।

डच टोलीका भान विकले नेपालका शीर्ष क्रमका भरपर्दा ब्याटर कुशल भुर्तेललाई सात रनमै आउट गराएका थिए । अनिल शाह ११ रन बनाएर पभेलियन फर्किए । तेस्रो नम्बरका अनिलले १२ बलमा ११ रन बनाएका हुन् । अनिल उनी आउट हुँदा नेपाल तीन विकेट गुमाएर ४० रन मात्र बनाएको थियो । कुशल मल्लले पनि नौ रन मात्र बनाउन सके । चौथो विकेटका रुपमा कुशल आउट हुँदा नेपालले ५२ रन मात्र बनाएको थियो ।

नेपाली टिमका थ्री डाइमेन्सनल खेलाडीका रुपमा परिचय बनाएका दीपेन्द्रसिंह ऐरीको पनि आज ब्याट चल्न सकेन । उनलाई पनि बास डी लिडले भान विकको हातबाट क्याच आउट गराएका हुन् । १० ओभर चार बलमा दीपेन्द्र आउट हुँदा नेपालको खातामा ५३ रन मात्रै थियो । नेपालको ब्याटिङमा गहिराइ भए पनि खेलाडीले सम्हालिएर खेल्न सकेनन् । नेपालले १३ रन बनाउँदा तीन विकेट गुमाउन पुग्यो ।

नेपालका लागि कप्तान रोहित पौडेलले मात्र सम्हालिएर खेल्न सके । उनले ३७ बलमा ३५ रन बनाएका थिए । यता सोमपाल कामीलाई मिकेरनले शून्यमै बोल्ड गरे । १४ रन बनाएर क्रिजमा जमिसकेका गुल्सन झालाई भान विकले बोल्ड गरेपछि नै नेपालको लगभग आशा समाप्त भएको हो । तर नवौं नम्बरमा मैदान प्रवेश गरेका करण केसीले दुई छक्का प्रहार गरेपछि भने डेथ ओभरमा नेपाली समर्थक उत्साही बनेका थिए । तर त्यो उत्साह पनि धेरै समय भने टिक्न सकेन ।

गुल्सन झाले १४ रन बनाउँदा करण पनि १७ रन बनाएर आउट भए । अन्तिममा सागर ढकाल अविजित रहे । १९ ओभर दुई बलमा अविनाश बोहोरलाई भान विकले कट एन्ड बोल्ड आउट गराएपछि नेपाल एक सय ६ रनमा नै समेटिएको हो ।

नेपालविरुद्ध पल भान मिकेरनले सबैभन्दा किफायति बलिङ गरे । उनले चार ओभरमा १९ रन मात्र खर्चिएर दुई विकेट आफ्नो नाम गरे । नेदल्यान्ड्सका लोगन भान विक र टिम प्रिन्ग्लेले समान तीन/तीन विकेट लिए । प्रिन्ग्लेले शीर्ष क्रमका तीन खेलाडीलाई आउट गराएर नेपालको ब्याटिङ लाइनपलाई धरापमा पारेका हुन् ।

जवाफमा नेदरल्यान्ड्सले पनि राम्रो सुरुआत भने गर्न सकेन । मिचेल लेबिट तीन बल खेलेर एक रन बनाएर आउट भएका थिए । तेस्रो नम्बरका विक्रमजित सिंहले २२ रन जोडेका थिए । यो जोडीले ४० रनको साझेदारी गरेका थिए । नवौं ओभरको दोस्रो बलमा विक्रमजित सिंह आउट भएपछि नेपालको आशा जागेको थियो । उनलाई दीपेन्द्रसिंह ऐरीले एलबीडब्ल्यू धरापमा पारेका थिए । उनले २८ बलमा २२ रन बनाए ।

चौथो नम्बरका स्याब्रान्ड एन्डल-बेच्ट १४ रन बनाएर रनआउट भए । उनलाई सोमपाल कामीले रनआउट गराउका हुन् । स्याब्रान्ड आउट हुँदा नेदरल्यान्ड्सले ७१ रन बनाएको सहज अवस्थामा पुगिसकेको थियो । उसका ओपनर म्याक्स ओ डाउड लामो समय मैदानमा टिकेका थिए । यता, अविनाश बोहोराले स्कट एडवार्ड्सलाई बोल्ड गराए । एडवार्ड्सले व्यक्तिगत पाँच रन मात्र बनाउन सके । नेदरल्यान्ड्सले ८० रन बनाएको अवस्थामा चौथो विकेट गुमाएको थियो । त्यतिबेला नेदरल्यान्ड्सलाई चार ओभर चार बलमा २७ रन मात्र आवश्यक थियो । आवश्यक रन पूरा गर्न नेदरल्यान्ड्सलाई धेरै दबाब नै भएन ।

रोहितले १८औं ओभरमा म्याक्स ओ डाउडको क्याच मिस गरे । नेपालले मिस गरेको यो दोस्रो क्याच थियो । अन्तिममा मैदानमा आएका बास डी लिडले म्याक्स ओ डाउडसँग नेपाली बलरले दिएको दबाब सामना गर्दै जित दर्ता गरेका हुन् । डेथ ओभरमा म्याक्स ओ डाउडले अविनाश बोहोराविरुद्ध एकै ओभरमा १५ रन प्रहार गरे ।

१८औं ओभरमा म्याक्स ओ डाउडले अर्धशतकसमेत पूरा गरेका थिए ।

यो पनि...

अमेरिकामा खेलाडीलाई हौस्याउन रंगशाला पुगेका नेपाली (फोटो फिचर)

नेपालद्वारा नेदरल्यान्डसलाई १०७ रनको लक्ष्य प्रस्तुत

‘नेदरल्यान्डस्‌सँगको खेलका लागि नेपाल सबै हिसाबले तयार छ’

नेपाल पनि सक्षम छ भन्ने सन्देश दिने बेला भइसक्यो : रोहित पौडेल

गुल्सन झा : नेपाली क्रिकेट टिमका जोशिला खेलाडी

नेपाली क्रिकेटका सफल ओपनर कुशल भुर्तेल : सानदार प्रदर्शनको अपेक्षा

विश्वकपमा सोमपालको प्रदर्शन कस्तो रहला ?

संघर्षले खारिएका अनिल साह : विश्वकपमा अब्बल साबित गर्ने अवसर

कठिन अवस्थामा उत्कृष्ट प्रदर्शन गर्दै आएका करणले विश्वकपमा कस्तो चमत्कार देखाउलान् ?

अविनाश बोहोराको बलिङ जादु, पूरा होला विश्वकपमा सुपर एटसम्म पुग्ने नेपालको लक्ष्य ?