इजरायल घटना : दार्चुलाका दुई युवाको निधन, प्रजिअसहितको टोलीले भेट्यो पीडित परिवार

दार्चुला । इजरायलमा हमास समूहले गत शनिबार गरेको आक्रमणमा १० नेपाली विद्यार्थीको मृत्यु भएको छ । तीमध्ये दुईजना दार्चुलाका युवा छन् ।

सुदूरपश्चिम विश्वविद्यालयको कृषि क्षेत्रको ‘लर्न एन्ड अर्न’ कार्यक्रमअन्तर्गत इजरायल गएका दार्चुला मालिकार्जुन गाउँपालिका ४, हुनैनाथका लोकेन्द्रसिंह धामी र लेकम गाउँपालिका ५, रिठाचौपाताका दिपेशराज विष्टको निधनले गाउँ शोकमग्न बनेको छ ।

चाडपर्वको मुखमा घरको जेठो छोरा गुमेको खबर सुनेपछि दिपेशकी आमा पार्वती अचेत छिन् । २० वर्षअघि पति गुमाएकी उनले जेठो छोरा गुमाउँएको खबर छिमेकी तथा सामाजिक सञ्जालबाट थाहा पाएकी हुन् । उनी बेहोस भएपछि उपचारका लागि अस्पताल भर्ना गरिएको छ ।

पढाइसँगै कमाउने रहरले इजरायल पुगेका दिपेशले पहिलो तलब नपाउँदै ज्यान गुमाउनुपरेको छ । विष्टले असोज ३ गतेदेखि काम सुरु गरेका थिए । विदेश गएको एक महिना पूरा हुन नपाउँदै मृत्युको खबरले परिवारमा सनान्टा छाएको छ ।

२४ वर्षीय दीपेश घरका जेठा छोरा थिए । उनका बुबा शिक्षक थिए । तर दीपेश सानै छँदा बुबाको निधनको बोझ सम्हालेकी पार्वतीले कमाउन सुरु गरेको घरको जेठो छोरा गुमाउँदा विक्षिप्त बनेकी छन् । पढाइ सकेर कमाइ सुरु गरेको छोराको मृत्युको खबरले पूरै परिवार विचलित भएको दिपेशका काका केशव विष्टले जनाए । गाउँले एक होनहार युवा गुमाएकाले पूरै शोकमा डुबेको छ ।

त्यस्तै मालिकार्जुन गाउँपालिका ४, हुनैनाथका २४ वर्षीय लोकेन्द्रसिंह धामीको पनि मृत्यु भएको छ । छोराको मृत्युको खबरले घरपरिवार विचलित अवस्थामा रहेको आफन्त एकेन्द्रसिंह धामीले जानकारी दिए । लोकेन्द्रको घरमा हजुरआमा, आमाबुबा, श्रीमती, ४ वर्षको छोरी र डेढ वर्षको छोरा छन् । लटिनाथ मावि चन्दनपुर चौपाताबाट आईएस्सी एजी पढेर बीएस्सी एजी पढ्न सुदूरपश्चिम विश्वविद्यालयको कृषि क्याम्पस टीकापुरमा अध्ययनरत थिए । गत महिना थप पढाइका लागि इजरायल गएका लोकेन्द्रको परिवारमा खुसी छाएको थियो । तर आइतबार एक्कासि छोराको मृत्युको खबर सुन्दा परिवार तथा गाउँ शोकमा डुबेको उनले जनाए ।

‘शव ल्याउन पहल भइरहेको छ’

प्रमुख जिल्ला अधिकारी किरण जोशीले इजरायलमा ज्यान गुमाएकामध्ये दार्चुलाका दीपेशराज विष्ट र लोकेन्द्रसिह धामीको परिवारलाई भेटेर सान्तवना दिएकी छन् ।

मृतकका परिवारलाई घरमै पुगेर प्रजिअसहितको टोलीले भेटेको हो । पीडित परिवारले जतिसक्दो चाँडो शव नेपाल ल्यादिन प्रजिअसहितको टोलीसँग आग्रह गरेका छन् ।

पीडित परिवारलाई सान्त्वना दिँदै उनीहरुले आफूहरुका तर्फबाट गर्न सकिने जति पहल गर्ने भन्दै शव जतिसक्दो चाँडो नेपाल ल्याउन सहयोग गर्ने आश्वासन दिए । भेटमा प्रजिअ जोशीले नेपाल सरकार तथा प्रजिअ कार्यालयबाट गर्नुपर्ने काम र पहलमा कुनै कमी हुन नदिने भनेकी छन् । प्रजिअ जोशीसँगै जिल्लास्थित सुरक्षा निकायका प्रमुखहरुको सहभागिता थियो ।