काठमाडौं । राष्ट्रपति रामचन्द्र पौडेलले सरकारको आगामी आर्थिक वर्ष २०८०/८१ नीति तथा कार्यक्रम पेस गरेका छन् । सङ्घीय संसद्को संयुक्त बैठकलाई सम्बोधन गर्दै राष्ट्रपति पौडेलले आज सरकारको नीति तथा कार्यक्रमको वाचन सुरु गरेका हुन् ।
बैठकको सुरुवातमा प्रधानमन्त्री पुष्पकमल दाहालले नीति तथा कार्यक्रमको सम्बोधनको प्रति राष्ट्रपतिसमक्ष पेस गरेका थिए । सङ्घीय संसद् भवन नयाँबानेश्वरमा अपराह्न ४ बजे सुरु भएको सदनको संयुक्त बैठकलाई राष्ट्रपति पौडेलले सम्बोधन गरिरहेका छन् ।
सङ्घीय संसद्को कुनै सदनको बैठक वा दुवै सदनको संयुक्त बैठकलाई राष्ट्रपतिले सम्बोधन गर्ने र त्यसका लागि सदस्यको उपस्थिति आह्वान गर्नसक्ने संवैधानिक व्यवस्था छ । राष्ट्रपतिमा निर्वाचित भएपछि सङ्घीय संसद्मा राष्ट्रपति पौडेलको यो पहिलो सम्बोधन हो ।
संसदीय लोकतान्त्रिक शासन प्रणाली अभ्यास गरेका मुलुकमा सरकारको वार्षिक नीति तथा कार्यक्रम सङ्घीय संसद्मा प्रस्तुत हुने र त्यसमाथि छलफल भई पारित गर्ने अभ्यास रही आएको छ ।
बैठकपछि आजै प्रतिनिधिसभा र राष्ट्रियसभाका बेग्लाबेग्लै बैठक बस्नेछन् । प्रधानमन्त्री दाहालले संसद्को दुवै सदनको संयुक्त बैठकलाई राष्ट्रपति पौडेलले गरेको सम्बोधनको प्रति ती बैठकमा टेबुल गर्नेछन् । सरकारले आज पेस गरेको नीति तथा कार्यक्रममाथि प्रतिनिधिसभा र राष्ट्रियसभामा आइतबारदेखि लगातार केही दिन छलफल हुनेछ । छलफलमा उठेको प्रश्नको प्रधानमन्त्रीले जवाफ दिनेछन् ।
नीति तथा कार्यक्रम पारित भएपछि प्रत्येक वर्ष जेठ १५ गते अर्थमन्त्रीबाट सदनसमक्ष आगामी आर्थिक वर्षको वार्षिक बजेट प्रस्तुत गरिने संवैधानिक व्यवस्था छ ।
सम्बन्धित समाचार...
संसद्मा बोल्दाबोल्दै राष्ट्रपतिले भने– चिसो भयो, तातोपानी चाहियो !
फरार भनिएकी मञ्जु खाण ‘संसद्मा हाजिर’
संसद भवनमा यसरी पुगे राष्ट्रपति पौडेल (भिडियो)
रेडियो नेपाल र नेपाल टेलिभिजन गाभिने
सहर र राजमार्ग वरपर एक हजार सार्वजनिक शौचालय बनाइने
सामूहिक तथा करार खेतीलाई प्रोत्साहन गरिने
अब सरकारी कार्यालयमा विद्युतीय सवारी
