काठमाडौं । प्रधानमन्त्री पुष्पकमल दाहालले नेपाली कांग्रेस र नेकपा एमाले मिलेर रहस्यमय तरिकाले संविधानमाथि छेडछाड गर्ने प्रयास गरिरहेको आरोप लगाउनुभएको छ । प्रधानमन्त्री दाहालले अहिलेको संविधान बनाउन माओवादी केन्द्रको सबैभन्दा ठूलो लगानी रहेकाले यसलाई कमजोर हुन नदिने प्रतिबद्धता पनि जनाउनुभयो ।
प्रतिनिधिसभामा आज (शुक्रबार) विश्वासको मतको प्रस्ताव पेस गर्दै प्रधानमन्त्री दाहालले कांग्रेस र एमालेले बन्द कोठामा सहमति गरेर आफूलाई हटाउने र संविधान संशोधन गर्न खोजेको आरोप लगाउनुभएको हो । उहाँले संविधान संशोधनका नाममा देशलाई द्वन्द्वतिर लैजान दुस्साहस नगर्न चेतावनी दिनुभयो ।
पहिलो र दोस्रो दल मिल्न बन्द कोठा किन चाहियो भन्दै प्रश्न गर्दै प्रधानमन्त्री दाहालले कांग्रेस र एमाले आफैं नमिलेको र राष्ट्रिय सहमतिका नाममा कसैले मिलाइदिएको आरोप पनि लगाउनुभयो ।
एमाले अध्यक्ष केपी ओलीप्रति लक्षित गर्दै प्रधानमन्त्री दाहालले संविधान र संसद जोगाउन कांग्रेस नेतृत्वलाई व्यङ्ग्यमिश्रित सुझाव दिनुभयो ।
उहाँले एमाले अध्यक्ष ओलीले आफूलाई धोका दिएको प्रसंग बारम्बार सुनाउनुभयो । प्रधानमन्त्री दाहालले आफू नेतृत्वको सरकारले ठुला भ्रष्टाचारका काण्ड खोतलेको, विभिन्न तहका नेताहरुमाथि छानबिन अघि बढाएको र देशलाई समृद्धिको बाटो अघि बढाएको दाबी गर्नुभयो ।
उहाँले राज्यका पाँच निकायमा प्रमुख पाँच दलको न्यायपूर्ण शक्ति बाँडफाँट गरेको र अर्थतन्त्र सुधारको बाटो आफैंले लगेको दाबीसमेत गर्नुभयो ।
यो पनि...
‘मैले एक मनले त बिहान सोचेको थिएँ- आजै मैले विश्वासको मत माग्न उचित होला, कि नहोला’
कांग्रेस र एमाले मिल्दा प्रतिगमन र निरंकुशताको डर छ : प्रधानमन्त्री दाहाल
संसद्मा प्रधानमन्त्री दाहाल : कांग्रेस-एमालेको सहकार्य कसैले मिलाइदिएको हो
नयाँ सरकार पनि संविधान नमिची बनाउनु होला : प्रधानमन्त्री दाहाल
ठूला भ्रष्टाचारका काण्ड खोतल्न थालेपछि डराएको वर्गले दुई दललाई मिलाइदियो : प्रधानमन्त्री दाहाल
