काठमाडौं । संसद्का प्रमुख २ दल कांग्रेस र एमालेबीच संविधान संशोधन गर्ने गरी सत्ता गठबन्धनको सहमति भएको छ । संविधान संशोधनका लागि संसदमा दुई तिहाइ बहुमत चाहिन्छ । के कांग्रेस र एमाले मिल्दैमा दुई तिहाइ सम्भव छ ? आउनुहोस् यसबारे चर्चा गरौँ ।
२ सय ७५ सदस्यीय प्रतिनिधिसभामा सबैभन्दा ठूलो दल कांग्रेससँग ८८ सिट छ भने दोस्रो ठूलो दल एमालेसँग ७९ सिट छ । यी दुवैको सङ्ख्या जोड्दा १ सय ६७ हुन्छ । दुई तिहाइ पुग्न कम्तीमा १ सय ८४ सांसद चाहिन्छ । दुई तिहाइ पुर्याउन उनीहरूलाई कम्तीमा १७ सदस्य अपुग हुन्छ । एकीकृत समाजवादीको १० तथा उपेन्द्र यादव नेतृत्वको जसपा नेपाल र महन्थ ठाकुर नेतृत्वको लोकतान्त्रिक समाजवादी पार्टी यो गठबन्धनमा सहभागी भए संविधान संशोधनका लागि पर्याप्त सङ्ख्या पुग्छ ।
त्यस्तै प्रतिनिधिसभामा तेस्रो दल माओवादी केन्द्रसँग ३२, चौथो दल रास्वपासँग २१, राप्रपासँग १४, जसपा नेपालसँग ५, जसपासँग ७, जनमत पार्टीसँग ६, लोसपासँग ४ सांसद छन् । राष्ट्रिय जनमोर्चा, नेपाल मजदुर किसान पार्टी र आम जनता पार्टीसँग १-१ सांसद हुँदा २ स्वतन्त्र सांसद छन् ।
संविधान संशोधन गर्नुपर्नेमा अधिकांश दल सहमत भए पनि उनीहरूका एजेन्डा भने फरक छन् ।
कांग्रेसले निर्वाचन प्रणाली संशोधनको मुद्दा जोडतोडले उठाएको छ भने यसमा एमालेको पनि समर्थन पनि देखिएको छ । मधेश केन्द्रित दलहरूले प्रदेशको स्वायत्त अधिकारको कुरा उठाइरहँदा राप्रपाले भने संघीयता र धर्मनिरपेक्षता हटाउनुपर्ने माग राखिरहेको छ ।
सम्बन्धित समाचार...
मध्यरातमा सहमति : सरकारको नेतृत्व डेढ वर्ष ओलीलाई त्यसपछि देउवालाई
देउवालाई दाहालको फोन : रास्वपासहितको गठबन्धन बनाऊँ, देउवाको जवाफ- त्यो च्याप्टर क्लोज भइसक्यो
मध्यराति सत्ता फेर्ने सहमति गरिएपछि मेयर बालेनको स्ट्याटस- ‘यो समय गिरिबन्धु चियाको हो’
