काठमाडौं । नेपाली कांग्रेसले सत्ता समीकरणका विषयमा नेकपा एमालेसँग भएको समझदारीअनुसार नै अघि बढ्ने निर्णय गरेको छ ।
पार्टी सभापति शेरबहादुर देउवाको निवास बूढानिलकण्ठमा आज बसेको कांग्रेस पदाधिकारी बैठकले एमालेसँग भएको समझदारीअनुसार अघि बढ्ने निर्णय गरेको हो । बैठकमा सभापति देउवाले एमाले अध्यक्ष केपी शर्मा ओलीसँग गएराति भएको समझदारीबारे जानकारी दिनुभएको थियो ।
नेताहरूका अनुसार देउवाले एमाले र कांग्रेसबीचको समझदारीअनुसार बन्ने सरकारको नेतृत्व आलोपालो गर्ने जानकारी गराउनुभएको थियो । बैठकमा संविधान संशोधनलगायतका विषयमा पनि सहमति कायम गरेर अघि बढ्ने र त्यसका लागि अन्य दलसँग पनि छलफल गर्ने निर्णय कांग्रेसले गरेको छ ।
कांग्रेस पदाधिकारीको बैठक चलिरहेका बेला प्रधानमन्त्री पुष्पकमल दाहालले सभापति देउवालाई टेलिफोन गर्नुभएको थियो । त्यस क्रममा दाहालले कांग्रेस, माओवादी केन्द्र, रास्वपालगायतका दल मिलेर सरकार गठन गर्न प्रस्ताव गर्नुभएको थियो । तर दाहालको प्रस्तावलाई देउवाले अस्वीकार गर्नुभएको कांग्रेसका एक नेताले जानकारी दिनुभयो ।
एमालेसँग भएको समझदारी अनुमोदन गर्न कांग्रेसले भोलि केन्द्रीय कार्यसम्पादन समितिको बैठक बोलाएको छ ।
सम्बन्धित समाचार...
मध्यरातमा सहमति : सरकारको नेतृत्व डेढ वर्ष ओलीलाई त्यसपछि देउवालाई
देउवालाई दाहालको फोन : रास्वपासहितको गठबन्धन बनाऊँ, देउवाको जवाफ- त्यो च्याप्टर क्लोज भइसक्यो
मध्यराति सत्ता फेर्ने सहमति गरिएपछि मेयर बालेनको स्ट्याटस- ‘यो समय गिरिबन्धु चियाको हो’
