कान्तिपुर टेलिभिजनले हरेक महिना प्रसारण/प्रकाशन भएका रिपोर्टहरूमध्ये हेर्नैपर्ने १० रिपोर्ट छनोट गरी दर्शक/पाठकका लागि पुनः प्रस्तुत गर्न गरेको छ । गत चैत महिनामा प्रकाशित/प्रसारित १० छुटाउन नहुने समाचार रिपोर्ट यस प्रकार छन् :
प्रदर्शनका क्रममा तीनकुनेको एक घरमा आगो लगाउँदा पत्रकार सुरेज रजकको जलेर मृत्यु भयो भने कीर्तिपुरका सविन महर्जन प्रहरीको गोली लागेर मारिए । राजावादीहरुले त्यसदिन सञ्चारगृहमाथि तोडफोड, जडीबुटी उत्पादन तथा प्रशोधन कम्पनीमा आगजनी, भाटभटेनी सुपरमार्केटमा लुटपाट मात्र गरेनन् निजी सम्पत्ति र पार्टीको कार्यालयसम्ममा तोडफोड र आगजनी गरे ।
सम्बन्धित रिपोर्ट र समाचारका लिङ्कहरु:
राजावादीको आन्दोलन : कसरी नियन्त्रण बाहिर गयो सुरक्षा व्यवस्था ?
समस्याग्रस्त घोषित १९ वटा सहकारीमा अहिले ५४ हजार ५ सय ५५ जनाको ३८ अर्ब ९३ करोड रकम फसेको छ । तर, १३ हजार ७५ जना ऋणीले सहकारीबाट रकम लगेर तिरेका छैनन् । पटक-पटक ताकेता गर्दा पनि ऋण नउठेपछि सरकारले ७ हजार ऋणिको त बैंक खाता र अचल सम्पत्ति नै रोक्का गरेको छ । यसले ऋण फिर्ता हुने क्रम केही बढे पनि ठूला ऋणी भने अझै रकम तिर्न तयार देखिएका छैनन् ।
दल र निर्वाचनलाई व्यवस्थित गर्ने गरी अगाडि बढेका यी विधेयकमा के-के नयाँ प्रावधानको व्यवस्था गरिएको छ त ?
कुपोषणको समस्या न्यूनीकरण गर्न संघीय सरकारका ७ वटा मन्त्रालयले बर्सेनि २ खर्ब रुपैयाँभन्दा बढी खर्च गरिरहेका छन । तर नेपालका बालबालिकामा पोषणको कमीबाट हुने समस्यामा सन्तोषजनक रुपले सुधार आउन सकेको छैन ।
बढ्दो जनघनत्व तथा थपिँदै गएका अग्ला घरका कारण शहरी क्षेत्रमा विपद् व्यवस्थापन चुनौतीपूर्ण बन्दै गएको छ । पछिल्लो समय शहरी क्षेत्रमा आगलागीका घटना बढिरहेका छन् । देशभर दैनिक १४ वटा आगलागीका घटना हुने गरेका छन् भने चालु आर्थिक वर्षको हालसम्म आगलागीबाट ६६ जनाको मृत्यु भइसकेको छ । तर दक्ष जनशक्ति, प्रविधि र सूचना प्रणाली नहुँदा शहरी क्षेत्रमा विपद्को जोखिम बढ्दो छ ।
सिरहाको औरहीमा महायज्ञका नाममा एउटा दलित परिवारको घर डोजर लगाएर भत्काइयो । औरही गाउँपालिका-५ का दीपक मल्लिकको परिवारलाई बाँसको टहरामा सारेर उनको घर डोजर लगाएर भत्काइयो र त्यहाँको माटो अशुद्ध भन्दै खनेर फ्याँकियो । यस घटनामा गाउँपालिका अध्यक्ष शिवजी यादव, पूर्ववडाध्यक्ष दिलीप यादव पक्राउ परेर धरौटीमा रिहा भएका छन् भने बजरंगी बाबा थुनामै छन् । औरहीमा दलित परिवारमाथि भएको यो अपराधबारे विनय आजादका रिपोर्टहरु ।
मठमन्दिर र पोखरी सरोवर प्राचीन मिथिलाको राजधानी जनकपुरधामका पहिचान हुन् । तर यो धार्मिक नगरीका मठमन्दिरको संरक्षण गर्नुपर्ने जनप्रतिनिधिले नै बहुमूल्य जग्गा कब्जा गरेको घटना एकपछि अर्को खुल्दैगएको छ । हत्याको आरोपमा महन्थ लामो समयदेखि फरार रहेका कारण एैतिहासिक मठमन्दिरको अवस्था पनि दयनीय छ ।
तीन पुस्ताको बसोवास छ, तर कुनै पुस्तालाई नागरिकता छैन । सप्तरीको शम्भुनाथ नगरपालिका वडा नम्बर ३ कचन्दाहाका एक मुसहर परिवारको यो वास्तविकता हो ।
मधेश प्रदेशमा मन्त्रालयबाटै योजना बिक्री हुने गरेको खुलासा भएको छ । प्रदेशले छानेका योजना कार्यान्वयन गर्न जिल्लास्थित कार्यालयले उपभोक्ता समिति गठन गर्न सम्बन्धित वडामा पठाउनुपर्ने कानुनी व्यवस्था छ । तर जिल्ला कार्यालयहरुले वडामा योजना नपठाई सिधै जनकपुरस्थित सम्बन्धित मन्त्रालयमा लैजाने र त्यहीबाटै बिक्री हुने गरेको हो । योजना बिक्रीमा सांसददेखि मन्त्रीकै संलग्नता रहेको पाइएको छ ।
लुम्बिनी प्रदेशको राजधानीमा प्रदेश सभा सदस्य र मन्त्रीका लागि धमाधम सुबिधासम्पन्न महलहरु निर्माण भैरहेका छन् । तर छेउकै बस्तीका बासिन्दालाई खोलो तर्ने पुल छैन । बस्ती समेत डुबानमा पर्दै आएको छ । बर्खाको त कुरै नगरौ हिउँदमा समेत ज्यान जोखिमा पारेर नदी वारपार गर्नुपर्ने अवस्था छ । लमही नगरपालिका -२ मा पर्ने सानो नदीमा २०६९ सालमै पुल निर्माण गर्ने भन्दै तत्कालीन सरकारले सर्भे गर्नुका साथै माटो परीक्षण गरेको थयो । तर अहिलेसम्म पुल बनेको छैन ।
