काठमाडौं । नयाँ दल गठन गरेको ६ महिनामै राष्ट्रिय स्वतन्त्र पार्टीका सभापति रवि लामिछाने सरकारको प्रभावशाली मानिने गृहसहित उपप्रधानमन्त्री बनेका छन् । राजनीतिमा रविको उदय जति आकस्मिक जस्तो लाग्छ, सत्ता लेनदेनका हिसाबले उनले पाएको पद झन् लोभलाग्दो मानिन्छ । तर रविले जुन मन्त्रालय लिए, त्यहीँ उनीविरुद्ध मुद्दा छ । नागरिकता र राहदानी सम्बन्धी विवादमा आफूविरुद्धको उजुरी बोकेर नयाँ गृहमन्त्रीले समग्र मुलुकको शान्ति सुरक्षाको जिम्मेवारी कसरी सामना गर्लान् ? भन्ने प्रश्न उठेको छ ।
पुराना र मूलधारका दलको विकल्प खोज्न भन्दै ६ महिना अघि राष्ट्रिय स्वतन्त्र पार्टी गठन गरेका सभापति लामिछानेले तिनै परम्परागत दलहरुसँग मिलेर उपप्रधानसहित गृहमन्त्रीको जिम्मेवारी लिएका छन् । सञ्चारकर्मीका रुपमा चर्चा कमाएर राजनीतिमा होमिएका लामिछानेले छोटो समयमा जुन हैसियत पाए, यस्तो संयोग नेपाली राजनीतिमा कमैले पाएका छन्। गृहमन्त्रीको शपथ लिएसँगै उनको परीक्षणको समय पनि सुरु भएको छ ।
अब लामिछानेको सत्तारोहण मात्रै निगरानीमा परेको छैन, उनले लिएको मन्त्रालयमा समेत मत बाझिएको छ । उनले अमेरिका र नेपालको दोहोरो नागरिकता लिएको उजुरी गृह मन्त्रालयमै छ । सर्वोच्च अदालतमा मुद्दा चलिरहँदा गृह मन्त्रालयमा परेको उजुरीका आधारमा प्रहरीले अनुसन्धान गरिरहेको छ । जहाँ आफूविरुद्ध उजुरी र मुद्दा छ, त्यही मन्त्रालयको जिम्मेवारीलाई कसरी हेर्ने त ?
लामिछानेले मतदाता परिचयपत्रमा १८ हजार २२२ नागरिकता नम्बर उल्लेख गरेका छन् । जुन उनले अमेरिका जानुअगाडि नै लिएको नागरिकताको हो । उनी अमेरिकी नागरिक हुँदा नेपालको नागरिकता स्वत: खारेज भइसकेको थियो । लामिछानेले एकै समयमा दुई देशका राहदानी लिएको देखिन्छ । सन् २०१५ मा पुरानै उनले नानगरिकता नम्बर प्रयोग गरेर नेपाली राहदानी लिएका थिए । जब कि, अमेरिकी राहदानीको मिति २०१४ देखि २०२४ सम्म छ । २०१५ मा उनले नेपालको राहदानी लिएका हुन् । नेपालको राहदानी लिन उनले पुनः पुरानो नागरिकता ब्युँताएका हुन् ? अनुसन्धानको जड यसैमा जोडिएको छ । आफ्नै नागरिकता र राहदानीसम्बन्धी विवाद नटुंगिँदै त्यही मन्त्रालय सम्हाल्न पुगेका लामिछानेले नागरिकतासम्बन्धी विधेयक टुंग्याउनुपर्ने जिम्मेवारी कसरी पूरा गर्छन् ? यो अर्को प्रश्न हो ।
गृह मन्त्रालय आन्तरिक सुरक्षाको नेतृत्वकर्ता पनि हो । राजनीतिले जिम्मेवारी दिए पनि प्रहरीमाथिको राजनीतिक हस्तक्षेप, आन्तरिक सुशासन, बलात्कार, हत्या, सुन तस्करीमाथि प्रश्न गर्ने रविले त्यो जिम्मेवारी अब आफैंले सम्हाल्नुपर्नेछ । आफूमाथि उठेका प्रश्नको निष्पक्ष जवाफ र नागरिकको सुरक्षा कसरी गर्छन् ? त्यो अबको परीक्षा पनि हो ।
सम्बन्धित समाचार...
नागरिकताका विषयमा रवि लामिछानेलाई निर्वाचन आयोगले सोध्यो स्पष्टीकरण
रवि लामिछानेको नागरिकता विवादमा प्रहरीले थाल्यो अनुसन्धान
रवि लामिछानेले विदेशी नागरिकता त्यागेको ‘निस्सा’ अमेरिकालाई सोध्ने कि काठमाडौंमै खोज्ने ?
