काठमाडौं । राष्ट्रपतिले सरकार गठनका लागि दिएको समय घर्किनै लाग्दा पनि दलहरु अडानबाट टसमस भएका छैनन् । राष्ट्रपति, प्रधानमन्त्री, सभामुखजस्ता मुख्य पद कसले के लिने भन्नेमै शीर्ष नेताहरु अल्झिएको भनिए पनि त्यसमा पार्टीभित्रका गुटगत समूहको समेत भूमिका देखिन्छ । विशेष गरी कांग्रेस र माओवादी केन्द्रभित्र फरक-फरक स्वार्थ समूह हावी हुँदा सहमति बन्न नसकेको हो ।
नेपाली कांग्रेसका सभापति शेरबहादुर देउवा राष्ट्रपति र प्रधानमन्त्री दुवै पद आफ्नै दलले लिने अवसरको खोजीमा छन् । तर सभापतिनिकटकै केही व्यक्ति भने प्रधानमन्त्री माओवादी केन्द्रलाई दिएर भए पनि गठबन्धनलाई निरन्तरता दिनुपर्ने भन्दै आएका छन् । उनीहरुको चाहना राष्ट्रपति आफ्नो पार्टीले लिने त छँदै छ, उपप्रधानमन्त्रीसहित शक्तिशाली मन्त्रालयको जिम्मेवारी लिएर गठबन्धन सरकारमा सहभागी हुने देखिन्छ ।
सभापति देउवा कुनै पनि हालतमा प्रधानमन्त्री नबनुन् भन्ने अर्को समूह पनि कांग्रेसमा सक्रिय देखिएको छ । तर, ठूलो दलको हैसियतमा सरकारको नेतृत्व पाउनुपर्ने विषय स्वाभाविक भएको देउवा पक्षका नेताहरुको तर्क छ ।
कांग्रेसभित्रको गुटगत राजनीतिका कारण माओवादी केन्द्रका अध्यक्ष पुष्पकमल दाहाललाई ढाडस मिलेको देखिन्छ । कुनै पनि हालतमा सरकारको नेतृत्व आफूले गर्ने दाबी गर्दै आएको माओवादी केन्द्रलाई एमालेले पनि भित्री रुपमा फकाउन थालेको छ । त्यही कारण एकातिर गठबन्धनमा अडान नछाड्ने र अर्कोतिर एमालेसँग पनि संवाद गर्ने माओवादीको रणनीति देखिन्छ । माओवादीभित्रको एउटा धार कम्युनिस्ट नै मिलेर अगाडि बढ्नुपर्छ भन्ने पक्षमा छ । त्यही धारले अध्यक्ष दाहाललाई प्रधानमन्त्रीको अडानबाट पछि फर्कन दिएको छैन ।
त्यसो त कांग्रेस र माओवादीबीच चरम अविश्वास पनि छ । प्रधानमन्त्री छाडेपछिको परिस्थिति के हुनसक्छ भन्नेमा आशंकै-आशंका छ । जसका कारण अहिले असमझदारी बढ्दै गएको र शक्तिका लागि जस्तोसुकै निर्णय लिन सक्ने विश्लेषण हुन थालेको छ ।
गठबन्धन दलबीच चुनावअघि भएका औपचारिक अनौपचारिक समझदारीको असर पनि अहिले देखिएको छ । कांग्रेस र माओवादीका शीर्ष नेताले अपेक्षा गरेअनुरुपको परिणाम नपाउँदा तरल अवस्थाको फाइदा लिने दाउ दुवैमा देखिन्छ ।
कांग्रेस र माओवादी केन्द्र एकले अर्कालार्इ गलाएर सकेसम्म धेरै शक्ति आफूसँग राख्ने प्रयत्नमा छन् । उनीहरु अहिलेकै अडानमा रहने हो भने राजनीतिमा नयाँ परिस्थिति सिर्जना नहोला भन्न सकिन्न ।
सम्बन्धित समाचार
पुष्पकमल दाहाललाई प्रधानमन्त्री बनाउन बालकोटमा सहमति
‘बालकोट गठबन्धन’लाई जुट्यो १६२ मत, प्रधानमन्त्रीमा दाबी पेस गर्ने तयारी
दाहाल-ओलीबीच छलफल भइरहेका बेला सीके राउतको प्रवेश
ओलीलाई अफरैअफर : मिलौं भन्दै देउवाले फोन गरे, दाहाल र लामिछाने भेट्न घरै पुगे
सबै कुरा अन्तिम घडीमा हुन्छ, गठबन्धन सकियो भन्दै दाहाल हिँड्नुभयो : प्रवक्ता कार्की
सहमति नजुटेपछि माओवादी अध्यक्ष दाहाल बालुवाटारबाट बाहिरिए
