काठमाडौं । नेकपा एमालेले ११औं महाधिवेशनका लागि देशैभरि प्रतिनिधि छनोट गरेको छ ।
कतिपय जिल्लामा सर्व-सहमति भए पनि अधिकांश जिल्लामा भने निर्वाचनमार्फत प्रतिनिधि चयन गर्न गरिएको हो । केहीमा भने विवाद र झडप समेत भएको छ । एमाले केन्द्रीय कार्यालयले प्रतिनिधि छनोटका लागि सबै निर्वाचन क्षेत्रमा उत्साहजनक सहभागिता रहेको जनाएको छ । एमाले प्रचार तथा प्रकाशन विभाग प्रमुख राजेन्द्र गौतमले अधिकांश जिल्लाबाट महाधिवेशन प्रतिनिधि छनोट भएको जानकारी दिनुभयो ।
यसैबीच, महाधिवेशन प्रतिनिधि छनोटलाई लिएर मोरङमा विवाद बढेपछि झडप भएको छ । मोरङ पार्टी कार्यालयमा भएको छलफलकै क्रममा कार्यकर्ताबीच भनाभन बढ्दै गएपछि हात हालाहाल भएको हो । घटनाका क्रममा नेताहरू बीच तीव्र वाद-विवाद चलेपछि केही आक्रोशित कार्यकर्ताले नेता पर्शुराम बस्नेतमाथि हातपात गरेका हुन् ।
विवाद रोक्न पार्टीका अन्य नेता तथा कार्यकर्ताले मध्यस्थता गर्न खोजे पनि केहीबेर वातावरण तनावपूर्ण बनेको थियो । एमाले मोरङमा कुल ४६ प्रतिनिधि चयन हुने भए पनि मनोनयनको संख्या तीन गुणा बढी भएपछि आन्तरिक तनाव बढेको छ । उता, धनकुटामा पनि विवाद उत्पन्न भएको छ।
सहमतिमै प्रतिनिधि चयन गर्ने प्रतिबद्धता गरेको केन्द्रीय सदस्य राजेन्द्र राई पक्षले आफ्नो पक्षका मान्छेलाई उम्मेदवारी फिर्ता लिन लगाएर मतदानको प्रक्रिया सुरू गरेको भन्दै कोशी प्रदेश सचिवालय सदस्य इन्द्रमणी पराजुली समूहले असन्तुष्टि जनाएको हो । पराजुली समूहले पत्रकार सम्मेलन गर्दै चुनाव प्रक्रियालाई पूर्ण रूपमा अस्वीकार गर्ने जनाएको हो ।
संघीय निर्वाचन क्षेत्रबाट खुला, महिला, दलित तथा युवाहरूसहित करिब दुई हजार प्रतिनिधि छनोट हुनेछन् । यस्तै प्रवास, जनसंगठन र विभागहरूबाट करिब एक सय प्रतिनिधि छनोट हुनेछन् । मंसिर २७ देखि २९ गतेसम्म हुने एमाले महाधिवेशनमा करिब २२ सय प्रतिनिधि सहभागी हुनेछन् ।
