एनपीएल : सुदूरपश्चिम प्लेअफमा

मंसिर १३, २०८२ |खेल ब्युरो
एनपीएल : सुदूरपश्चिम प्लेअफमा

काठमाडौं । सुदूरपश्चिम रोयल्स दोस्रो संस्करणको नेपाल प्रिमियर लिग-एनपीएलको प्लेअफ पुग्ने पहिलो टोली बनेको छ । 

शनिबार सम्पन्न खेलमा साविक विजेता जनकपुर बोल्ट्सलाई ६ विकेटले पराजित गर्दै सुदूरपश्चिम लगातार पाँच खेल जितेर प्लेअफमा पुगेको हो । यस जितसँगै अपराजित सुदूरपश्चिम पहिलो क्वालीफायर्सको समेत निकै नजिक पुगेको छ । अंकविहीन जनकपुर भने अंक तालिकाको पुछारमा रहेको छ । 

यस हारले साविक विजेता जनकपुरको प्लेअफमा पुग्ने अंक गणितीय सम्भावनामात्र जीवित रहेको छ । कीर्तिपुरस्थित टीयू क्रिकेट मैदानमा टस जितेर पहिले ब्याटिङ गरेको जनकपुरले निर्धारित २० ओभरमा ८ विकेट गुमाएर १ सय ४५ रनको योगफल तयार पारेको थियो ।

नियमित कप्तान अनिल शाहलाई आराम दिएर वायन पार्नेललाई नेतृत्व सुम्पिएको जनकपुरले यस खेलमा पनि खराब सुरूवात गरेको थियो । आसिफ शेख लगातार दोस्रो खेलमा गोल्डेन डक भएका थिए । ३५ रन जोड्दा सुरूवाती ३ विकेट गुमाइसकेको जनकपुरका लागि जान लफ्टी इटन र कृष्णमूर्तिले ३९ तथा कृष्णमूर्ति र आदिल्य मण्डलले ५५ रनको साझेदारी गरेका थिए । लफ्टी इटनले ३९ रन जोडे । आदित्य १५ रनमा आउट भए । 

कृष्णमूर्तिले सर्वाधिक ५० रनको अर्धशतकीय योगदान दिए । सुदूरपश्चिमका अविनाश बोहराले ४, स्कट कुगेलाइनले ३ र कप्तान दीपेन्द्रसिंह ऐरीले एक विकेट हात पारे । जवाफमा १ सय ४६ रनको लक्ष्य सुदूरपश्चिमले १७ ओभर ४ बलमा ४ विकेट गुमाएर पुरा गर्यो । एक रनमै २ विकेट गुमाएको सुदूरपश्चिमका लागि इशान पाण्डे र विनोद भण्डारीले ७४ बलमा ९२ रनको साझेदारी गरे । 

विनोदले ४२ रन जोडे । इशानले ३५ बलमा ५ चौका र १ छक्कासहित सर्वाधिक ५६ रनको अर्धशतकीय योगदान दिए । सुदूरपश्चिमले शनिबार इशानको ब्याटिङ अर्डर प्रमोसन गरेको थियो । हरमित सिंहले १० बलमा अविजित २५ रन बनाए । दिपेन्द्र १० रनमा नटआउट रहे । 

जनकपुरका लागि माज सदाकतले २ विकेट लिए । लगातार चौथो हारपछि जनकपुर लिग चरणबाटै बाहिरिने खतरा बढेको छ । अंकगणितीय झिनो सम्भावनाबीच जनकपुरले प्लेअफ पुग्न आफ्ना बाँकी ३ खेल जित्नु पर्ने छ भने टिमको नतिजामा पनि भर पर्नु पर्ने छ । अर्कोतर्फ यस जितले सुदूरलाई प्लेअफमा पुर्याएको छ । 

पाँच खेलमा शतप्रतिशत नतिजा हात पारेको सुदूरपश्चिमले बाँकी दुई मध्ये एक खेल जिते सिधै पहिलो क्वालिफयर्समा पुग्ने छ ।