दाङ । नेपाली कम्यूनिष्ट पार्टीका संयोजक पुष्पकमल दाहालले एमाले अध्यक्ष केपी शर्मा ओली विचारविहीन, इतिहासविहीन र उट्पट्याङ गर्ने जोकर मात्रै भएको आरोप लगाउनु भएको छ ।
लुम्बिनी प्रदेश स्तरिय एकता सन्देश सभालाई शनिबार लमहीमा सम्बाेधन गर्दै संयोजक दाहालले नेपाली राजनीतिमा कुनै पनि त्याग तपस्या नभएका, निति विधि नभएका मान्छेले मुलुकलाई पार लगाउँछु भन्नु र गोरू व्याउनु एकै भएको उहाँको टिप्पणी छ ।
संयोजक दाहालले एमालेमा ओलीकै रबैयाका कारण पार्टी छाड्ने र नेपाली कम्युनिष्ट पार्टीमा सामेल हुने क्रम नरोकिएको भन्दै अझै थुप्रै वामपन्थी एकता केही समयमै हुने दाबी गर्नु भयो । चुनाव जितेर दुईतिहाइ बहुमत भएर मात्रै केही नहुने भन्दै संयोजक दाहालले जनताको एकतानै बलियो तागत भएको दाबी गर्नु भयो ।
सभालाई सम्बोधन गर्दै नेपाली कम्यूनिष्ट पार्टीका सहसंयोजक माधवकुमार नेपालले केपी शर्मा ओलीलाई सम्झाउन र सुधार्न चाहे पनि त्यसो हुन नसकेको बताउनु भयो । केपी शर्मा ओलीलाई सुधार्न आफुहरूबाट भएको प्रयास असफल भएपछि र ओलीबाट मुलुकले पार नपाउने अवस्था आएपछि उनको साथ छाडेर देशको लागि, जनताको लागि, समाजको लागि समर्पित भएर बृहत वाम एकतामा लागेको बताउनु भयो ।
