काठमाडौं । नेपाल प्रिमियर लिग एनपीएल २०२५को १९औं खेलमा आज कर्णाली याक्स र काठमाडौं गोर्खाज प्रतिस्पर्धा गर्दैछन् । टीयु अन्तर्राष्ट्रिय क्रिकेट मैदानमा खेल नेपाली समय अनुसार दिउँसो साढे ३ बजे हुनेछ ।
दुवै टोली लिग चरणमा आफ्नो स्थान सुधार गर्ने लक्ष्यमा हुने छन् । काठमाडौा गोर्खाजलाई यो खेल जित्दै तालिकाको दोस्रो स्थानमा उक्लिने अवसर हुने छ । साथै उ जितसहित प्लेअफको निकै नजिक पुग्ने योजनामा हुने छ । प्लेअफमा पुग्न कर्णाली याक्सका लागि जित अनिवार्यजस्तै बनेको छ । यस खेलमा पराजित भए कर्णाली लगभग प्रतियोगिताबाट बाहिरिने छ ।
अघिल्लो खेलमा कर्णाली याक्सले बिराटनगर किङ्ससँग ३ विकेटले हार बेहोरेको थियो । पहिले ब्याटिङ गर्दै कर्णालीले निर्धारित २० ओभरमा ३ विकेट गुमाएर १ सय ६० रनको प्रतिस्पर्धात्मक योगफल तयार पारेको थियो । मार्क वाट सस्तैमा पभेलियन फर्किए पनि प्रियाङ्कले ६३ रन र विलियम बोसिस्टोले ४९ रनको महत्वपूर्ण योगदान दिएका थिए । ।
गुलशन झाले १० बलमा २० रनको आक्रमक इनिङ्स खेलेका थिए । जवाफमा, बिराटनगर किङ्सले खराव सुरुवात गरेपनी बसिर अहमदले मात्र ४३ बलमा ६२ रन प्रहार गर्दै खेलको दिशा मोडेका थिए । नारायण जोशीको उपयोगी इनिङ्ससँगै बिराटनगर किङ्सले अन्तिम ओभरमा लक्ष्य पुरा गरेको थियो । जुन खेल एनपीएल इतिहासकै रोमान्चक खेल मध्य एक थियो । कर्णालीका लागि प्रियाङ्क पञ्चालले सर्वाधिक १ सय ६५ रन बनेका छन् । कप्तान सोमपाल कामीले ८ विकेट हात पारेका छन् ।
अघिल्लो खेलमा काठमाडौा गोर्खाजले चितवन राइनोजविरुद्ध उत्कृष्ट प्रदर्शन गर्दै ५३ रन अन्तरको सानदार जित निकालेको थियो । पहिले ब्याटिङ गर्दै काठमाडौाले १ सय ४२ रन बनाएको थियो । टोलीले सुरुमै ३ विकेट गुमाएर दबाबमा परेपनी मिलिन्द कुमारले ३८ रन र जोन सिम्पसनले २९ बलमा ६० रनको आक्रामक इनिङ्स खेल्दै टोलीलाई सम्मानजनक स्कोरसम्म पुर्याएका थिए । लक्ष्य पछ्याउने क्रममा चितवनका दीपक बोहरा र डेविड मालान सस्तामा आउट भए ।
सैफ जाइब र कुशल मल्लले पनि रन बनाउन नसकेपछि टोली संकटमा परेको थियो । काठमाडौाका शाहाब आलम र राशिद खानले शानदार बलिङ प्रदर्शन गर्दै २-२ विकेट लिए र चितवन राइनोजलाई ८९ रनमै समेटिदिएका थिए ।
काठमाडौाका तर्फबाट जोन सिम्पसन सर्वाधिक १ सय १२ रन बनाएका छन् । बलिङतर्फ मिलिन्द कुमार र कप्तान करण केसीले समान ९-९ विकेट लिएका छन् ।
हाल काठमाडौा गोर्खाज ६ अंकसहित तालिकाको तेस्रो स्थानमा छ । उसले ५ मध्य ३ खेलमा जित दर्ता गरेको छ भने २ खेलमा हार व्यहोरेको छ । कर्णाली याक्स अहिले अंक तालिकाको छैठौं स्थानमा रहेको छ । टोलीले अहिलेसम्म १ खेलमा जित हासिल गरेको छ भने ३ खेलमा पराजय भोगेको छ ।
