काठमाडौं । मंगलबार अमेरिकी पूर्वराष्ट्रपति डोनाल्ड जे. ट्रम्पले आपराधिक अभियोगमा न्युयोर्कको फौजदारी अदालतको सामना गरे । अमेरिकी इतिहास मै यो पहिलो घटना थियो- जसमा अमेरिकाका एक पूर्वराष्ट्रपतिलाई आपराधिक अभियुक्त जस्तै गरी फौजदारी अदालतमा पेस गरियो ।
न्युयोर्क ग्रान्ड ज्युरीले नै औपचारिक रूपमा अभियोग लगाएपछि मंगलबार ट्रम्पले अदालतसामु आत्मसमर्पण गरे ।
ट्रम्पमाथि आपराधिक रेकर्डलाई गलत साबित गर्न झुटा व्यावसायिक विवरणहरू सम्बन्धी ३४ वटा जघन्य अपराधहरू गरेको अभियोग लगाइएको छ । उनीमाथि ठूलो परिमाणमा रकम निकासा गरेको आरोप छ ।
यो त्यस्तो भुक्तानी हो जो कुनै अवैध वा आपराधिक कार्यको तथ्य गोप्य राख्न एवं त्यस बारेमा मौन रहनका लागि आकर्षक रकम प्रदान गरिन्छ । ट्रम्पले आफ्ना यस्तै व्यावहार लुकाउनको लागि राष्ट्रपतीय चुनाव २०१६ को केही दिन अगाडि मात्रै स्ट्रमी डेनियल नाम गरेकी एक महिलाको नाममा ठूलो रकम तिरेको आरोप छ ।
कुरा सन् २०१६ को राष्ट्रपतीय चुनावकै दौरानको हो । ट्रम्प त्यतिबेला अमेरिकी अश्लील चलचित्र अभिनेत्री स्टर्मी डेनियललाई एक सम्भावित ‘यौन काण्ड’ का बारेमा मुख नखोल्ने बनाउनका लागि गोप्य रूपमा १ लाख ३० हजार अमेरिकी डलर दिएको भन्ने आरोप लाग्दै आएको थियो ।
ट्रम्पमाथि बारम्बार कानुन उल्लंघन गरेको र आफ्ना आपराधिक रेकर्डलाई लुकाउने कोसिस गरेकका आरोप छन् । न्युयोर्क राज्यको सर्वोच्च अदालत, न्युयोर्क काउन्टीले एक दस्ताबेजमा भनेको छ– ट्रम्पले सन् २०१६ को राष्ट्रपतीय चुनावका दौरान मतदाताबाट आफ्ना आपराधिक आचरण लुकाउनको लागि बारम्बार र धोखाधडीपूर्वक ‘न्यूयोर्क विजनेस रेकर्ड’ गलत साबित गरे ।
ट्रम्पले भने अदालतमा आफूलाई निर्दोष घोषणा गरेका छन् । यद्यपि यस विषयमा अनुसन्धान अघि बढिरहेको छ ।
अदालतमा के भयो ?
डोनाल्ड ट्रम्पले मंगलबार म्यान्ह्याटनस्थित फौजदारी अदालतमा आत्मसमर्पण गरेपनि उनलाई हतकडी भने लगाइएन । ट्रम्पले अदालत जाँदै गर्दा आफूलाई पक्राउ गरिने कुरा निकै अवास्तविक लागेको भन्दै सामाजिक सञ्जालमा लेखेका थिए । हुन पनि ट्रम्पलाई पक्राउ गरिएला र उनले फौजदारी अभियोगमा अदालतसमक्ष आत्मसमर्पण गर्लान् भन्ने अधिकांश अमेरिकीहरूले सोचेका थिएनन् ।
अदालतबाहिर जम्मा भएको भिडतिर हेरेर हात हल्लाउँदै अदालत प्रवेश गरेका ट्रम्प केही चिन्तित तर शान्त र गम्भीर मुद्रामा देखिन्थे । उनको अदालत प्रवेशसँगै ट्रम्पविरुद्धको मुद्दा दर्ता प्रक्रिया अघि बढाइयो ।
अदालतसमक्ष ट्रम्पले आफूमाथि लगाइएको अभियोग झुटा भएको र आफू निर्दोष भएको दाबी गरे ।
मंगलबारै अदालतबाट फर्केपछि फ्लोरिडा पुगेर ट्रम्पले एक सम्बोधान गरे । ‘मैले कहिल्यै सोचेको थिइनँ कि अमेरिकामा यस्तो हुन सक्छ, यस्तो हुन सक्छ भनेर मैले कहिल्यै पनि सोचेको थिइनँ । मैले गरेको एक मात्र अपराध केहो भने मैले हाम्रो राष्ट्रलाई नष्ट गर्न खोज्नेहरूविरुद्ध निडरताका लडेँ,’ ट्रम्पले सम्बोधनका क्रममा भने ।
के थियो ट्रम्पले दबाउन खोजेको घटना ?
कुरा सन् २०१६ को राष्ट्रपतीय चुनावकै दौरानको हो । ट्रम्प त्यतिबेला राष्ट्रपतिका उम्मेदवार थिए । उनले अमेरिकी अश्लील चलचित्र अभिनेत्री स्टर्मी डेनियललाई एक सम्भावित ‘यौन काण्ड’ का बारेमा मुख नखोल्ने बनाउनका लागि गोप्य रूपमा १ लाख ३० हजार अमेरिकी डलर दिएको भन्ने आरोप लाग्दै आएको थियो । जुन निर्वाचन कानुनको उल्लंघनका साथै गैरकानुनी पनि थियो ।
गत हप्ता भने औपचारिक रूपमै त्यो अभियोग अदालतमा दर्ता भयो । न्यूयोर्कको फौजदारी कानुनको धारा १७५.१० अन्तर्गत ट्रम्पविरुद्ध ३४ वटा गम्भीर अपराधका मुद्दामा अभियोग लगाइएको छ ।
डेनियलको आरोप
डेनियलको भनाइ के छ भने सन् २००६ को सुरुवातमा ट्रम्पसँग उनको ‘लभ अफेयर’ थियो । तर ट्रम्प डेनियलको उक्त दाबीको ट्रम्पले सधैँ अस्वीकार गर्दै आएका छन् । सन् २००६ मा, जुनबेला ट्रम्प व्यावसायी थिए– त्यसबेला क्यालिफोर्निया र नेवादाको बीचमा पर्ने एक होटलमा उनीसँग आफ्नो भेट भएको डेनियलको दाबी छ ।
२०११ मा ट्रम्पले डिनरका लागि बोलाएकाले आफू ट्रम्पको हटल कोठामा भेट्न पुगेको डेनियल बताउँछिन् । त्यही होटलमा ट्रम्पसँग आफ्नो सम्बन्ध बनेको पनि उनले दाबी गरेकी छन् । तर ट्रम्प उनका सबै दाबीको अस्वीकार गर्छन् ।
डेनियल के भन्छिन् भनेट्रम्प त्यसबेला अमेरिकी टेलिभिजन शो 'द एपरेन्टिस' चलाउँथे। उनले त्यस टेलिभिजन सिरिजमा आफूलाई स्थान दिनेसमेत बताएको डेनियलको दाबी छ ।
३४ वटा गम्भीर अपराधमा केके छन् ?
ट्रम्पलाई विपक्षी बनाएर न्युयोर्क काउन्टी जिल्ला अधिवक्ता एल्विनले दायर गरेको मुद्दामा ३४ वटा आपराधिक अभियोग लगाइएको छ । यद्यपि ती सबै अभियोगहरू सम्भावित 'यौन काण्ड' र २००७ को भनिएको उक्त सम्बन्धका बारेमा डेनियललाई मुख नखोल्ने बनउन दिइएको रकमकै बारेमा छन् । उक्त अभियोगहरूमा– ट्रम्पले झुटा व्यवसायिक विवरणहरू पेस गरेको र त्यसका लागि ३४ वटा ‘फस्ट डिग्रीका’ अपराध अर्थात् जघन्य अपराध गरेको भनिएको छ । ती अभियोगहरू पोर्नस्टार डेनियल्सलाई ट्रम्पका वकिल माइकल कोहेनमार्फत् भुक्तान गरिएको १ लाख ३० हजार अमेरिकी डलरसँग जोडिएका छन् ।
त्यो घटनासँग सम्बन्धित कारोबारहरू फरक फरक मितिमा चेक, बिल र भौचरका माध्यामबाट भएका विस्तृत विवरणहरू पनि अभियोग पत्रमा समावेश छन् ।
अदालतको दस्तावेजमा ट्रम्पले दण्ड कानुन उल्लंघन गर्नुका साथै न्युयोर्क काउन्टी र त्यस आसपासमा ठगी गर्ने, अपराध गर्ने वा आपराधिक कार्यमा सहयोग गर्ने मनसायले व्यवसाय गरेकोसमेत उल्लेख छ । उनले आपराधिक कार्य लुकाउन धेरैपटक गलत दस्तावेज पेस गरेको र सन् २०१६ को राष्ट्रपतीय निर्वाचनमा त्यसैका कारण ट्रम्प बारेका गलत सूचनाहरू मतदाताहरूबाट लुकाइएको अदालतले ठहर गरेको छ ।
अमेरिकामा कुनै अपराधलाई झुठा विवरण वा दस्तावेज देखाएर लुकाइनुलाई त्यहाँको कनुनले जघन्य अपराध मान्छ ।
त्यसैले ट्रम्पले दण्डकानुन उल्लंघन गरेको भन्दै उनलाई उक्त कानुनको १७५.१० अनुसार सजाय हुनुपर्ने मागगरिएको छ । यदि त्यसअनुसार हदैसम्मको सजाय भए ट्रम्पलाई कारावास पनि हुन सक्नेछ ।ट्रम्पले ‘राष्ट्रपतीय चुनाव २०२४’ लड्न पाउलान् ?
ट्रम्प आगामी २०२४ मा हुने राष्ट्रपतीय चुनाव लड्ने तयारीमा छन् । ट्रम्प कुनै पनि हालतमा आगामी राष्ट्रपतीय चुनाव लड्ने बताउँदै पनि आएका छन् ।
ट्रम्पको मुद्दाका लागि न्युयोर्क सिटीका सरकारी वकिल एल्विनले एक ग्रेन्ड जुरीको गठन गरेका थिए । उक्त जुरीले ट्रम्पविरुद्ध मुद्दा चलाउनका लागि अदालतसँग प्रयाप्त प्रमाणहरू भएको बताएको छ । ट्रम्पविरुद्धको मुद्दाबारे बोल्दै एल्भिनले भनेका छन्, ‘तपाई जो भएपनि फरक पर्दैन । न्युयोर्क राज्यमा यी जघन्य अपराध हुन् ।’
हुन त कुनै अपराधमा दोषी ठहरिएका व्यक्तिलाई राष्ट्रपतिको उम्मेदवार बन्न अयोग्य मान्ने अमेरिकी कानुनी प्रावधान नभएकाले उनी चुनाव भने लड्न पाउने छन्, जित्छन् या हार्छन् त्यो छुट्टै कुरा हो । तर यदि उनी गिरफ्तार भए भने राष्ट्रपति बन्ने उनको यात्र थप जटिल र चुनौतीपूर्ण हुने भने देखिन्छ ।
सम्बन्धित समाचार...
अमेरिकी पूर्वराष्ट्रपति ट्रम्पविरुद्ध फौजदारी अभियोगमा मुद्दा चलाइने
अदालतमा उपस्थित हुन न्यूयोर्क पुगे ट्रम्प, सुरक्षा व्यवस्था कडा
