काठमाडौं । गृहमन्त्री सुधन गुरुङले राजीनामा दिनुभएकाे छ ।
लगानीका विषयमा विवाद भइरहेका बेला उहाँले पदबाट राजीनामा दिनुभएकाे हो । गृहमन्त्री गुरुङले सामाजिक सञ्जालबाट राजीनामा दिएको घोषणा गर्नुभएकाे हाे ।
सामाजिक सञ्जालमा उहाँले लेख्नुभएकाे छ, 'मसँग सम्बन्धित विषयमा निष्पक्ष छानबिन होस् र पदमा रहँदा कन्फ्लिक्ट अफ इन्ट्रेस्ट नदेखियोस् र त्यसमा कुनै असर नपरोस् भन्ने उद्देश्यले मैले आजकै मितिदेखि लागू हुने गरी गृहमन्त्री पदबाट राजीनामा दिएको छु।'
सामाजिक सञ्जालमा विस्तृतमा उहाँले लेख्नुभएकाे छ, 'म, सुदन गुरुङ, मिति २०८२ चैत १३ गतेदेखि गृह मन्त्रीको जिम्मेवारीमा इमानदारीपूर्वक काम गर्दै आएको छु। पछिल्ला दिनहरूमा नागरिक स्तरबाट मेरो शेयर लगायतका विषयमा उठेका प्रश्न, टिप्पणी र जनचासोलाई मैले गम्भीर रूपमा लिएको छु। मेरो लागि पदभन्दा ठूलो कुरा नैतिकता हो, र जनविश्वासभन्दा ठूलो शक्ति कुनै हुँदैन। आज देशमा सुशासन, पारदर्शिता र जवाफदेहिताको माग गर्दै उठिरहेको Gen Z आन्दोलनले पनि यही सन्देश दिएको छ सार्वजनिक जीवन स्वच्छ हुनुपर्छ, नेतृत्व उत्तरदायी हुनुपर्छ।मेरा ४६ जना भाइ बहिनिहरुको रगत र बलिदानी को आडमा बनेको सरकारलाई कसैले प्रश्न गर्छ भने त्यसको जवाफ नैतिकता हो। त्यसैले, मसँग सम्बन्धित विषयमा निष्पक्ष छानबिन होस् र पदमा रहँदा conflict of interest नदेखियोस र त्यसमा कुनै असर नपरोस् भन्ने उद्देश्यले मैले आजकै मितिदेखि लागू हुने गरी गृह मन्त्री पदबाट राजीनामा दिएको छु। मैले आफ्नो तर्फबाट नैतिक जिम्मेवारी निर्वाह गरेको छु। अब मेरो अपिल छ, प्रिय सञ्चारकर्मी मित्रहरू, आम नेपाली दाजुभाइ, दिदीबहिनी र युवाहरू, यदि हामी साँच्चै परिवर्तन चाहन्छौँ भने सत्य, इमानदारी र आत्मशुद्धिको बाटोमा सबै उभिनैपर्छ।कति मिडियाकर्मी साथी हरु को कहा कहा स्वीट शेयर छ बिस्तारै आउला, रामराज्यको चाहना राख्नेहरूले त्याग र नैतिक साहस पनि देखाउन सक्नुपर्छ।'
रास्वपा नेतृत्वको सरकार बनेको एक महिना नहुँदै दुईजना मन्त्रीले पद गुमाएका छन् । प्रधानमन्त्री वालेन्द्र शाह नेतृत्वको सरकार बनेको २७औं दिनमै गृहमन्त्री सुधन गुरुङले पद त्याग गर्नुपरेको छ । यसअघि सरकार बनेको १३ दिनमै श्रममन्त्री दीपककुमार साहलाई हटाइएको थियो।
सुशासनलाई मुख्य प्राथमिकतामा राखेको रास्वपाले चैत १३ गते सरकार बनाएको थियो । त्यही सुशासनको मुद्दाले सम्पत्तिमाथि प्रश्न उठ्दा विवादमा तानिएपछि गृहमन्त्री सुधन गुरुङले प्रधानमन्त्री शाहसमक्ष राजीनामा दिनुभएको हो । प्रधानमन्त्रीका सञ्चारविज्ञ दीपा दाहालले तत्काललाई गृह मन्त्रालय प्रधानमन्त्री शाहसँगै रहेको जानकारी दिनुभयो ।
यसअघि श्रममन्त्री दीपककुमार साहलाई चैत २६ गते पदबाट हटाइएको थियो । आफ्नी श्रीमतीलाई बीमा बोर्डको सदस्यमा अनधिकृत रुपमा सहभागी गराउने भूमिका खलेको भन्दै विवादमा परेपछि शाहलाई रास्वपाले तत्कालै पदबाट फिर्ता बोलाउने निर्णय गरेर प्रधानमन्त्रीलाई सिफारिस गरेको थियो ।
