काठमाडौं । संसद् भवन नयाँ बानेश्वरमा प्रवेश गरेको आरोपमा सोमबार पक्राउ परेका लघुवित्तपीडितहरु हाजिर जमानीमा आज (बिहीबार) रिहा भएका छन् ।
प्रहरीका अनुसार उनीहरुलाई जिल्ला प्रशासन कार्यालय काठमाडौंले हाजिरी जमानीमा छाडेको हो ।
देशका विभिन्न स्थानबाट काठमाडौं आएका लघुवित्तका पीडितहरुले गएको सोमबार संसद भवन परिसरमा प्रवेश गरेर नाराबाजी गरेका थिए ।
निषेधित क्षेत्रमा प्रवेश गरेर नाराबाजीसहित शान्तिसुरक्षामा खलल पुर्याएको भन्दै प्रहरीले ४९ जनालाई नियन्त्रणमा लिएको थियो । उनीहरुलाई अनुसन्धानका लागि ७ दिन थुनामा राख्न स्थानीय प्रशासनले अनुमति दिएको थियो ।
आज भने उनीहरु सबै हाजिर जमानीमा रिहा भएका हुन् ।
उनीहरुले तत्काल लघुवित्त पीडितहरुको ऋण मिनाहा हुनुपर्ने र धितो लिलाम फुकुवा गर्नुपर्नेलगायत माग गर्दै आएका छन् । सरकारलाई समेत उनीहरुले यस विषयमा पटकपटक ध्यानाकर्षण गराएका थिए ।
यो पनि...
संसद्जस्तो संवेदनशील स्थानमा किन सुरक्षा लापरबाही ?
सुरक्षा घेरा तोडेर आखिर कसरी संसद् भवनमा प्रवेश गरे प्रदर्शनकारी ?
नेपाल बाहिर कहाँ-कहाँ भएका थिए संसदमा गम्भीर सुरक्षा चुकका घटना ?
