दैलेख । देशमा यतिबेला तीन तहका सरकार छन् । सिंहदरबारदेखि स्थानीय तहका सरकारको नेतृत्व गर्नेहरुले हरेक दिन समृद्धिको भाषण गरिरहँदा दुर्गमको जनजीवन कस्तो छ भन्ने दृष्य आज अछाम र दैलेखको सिमाना, कर्णाली नदीमा देखियो । दैनिक उपभोग्य सामग्री ढुवानी गरिरहेका १३ खच्चड जब झोलुंगे पुलमा अड्किए ।
अछामबाट दैलेखतिर सामान बोकेर हिँडेका १३ वटा खच्चड आइतबार बिहान ९ बजेतिर कर्णाली नदीको झोलुंगे पुलमा फसे । अछामको पञ्चदेवल विनायक नगरपालिका ९ बाट दैलेखको आठबीस नगरपालिका ४, खिड्कीज्युला बजारमा मानिसलाई चाहिने दैनिक उपभोग्यवस्तु लिएर उनीहरु हिँडेका थिए । मानिसकै लागि आवश्यक सर-सामग्री बोकेर हिँडेका यी खच्चड जीर्ण पुलमा फस्दा आफ्नो उद्धार गर्ने मानिस भने भेट्न सकेनन् ।
६ घण्टाभन्दा बढी अत्यन्तै हृदयविदारक देखिने गरी यो पुलमा खच्चडहरु जीवनरक्षाको प्रतीक्षामा बसे । ६ घण्टासम्म उद्धारको प्रतीक्षामा पुलको जालीमा अल्झिएका उनीहरुको उद्धारका लागि कसैले हिम्मत गर्न सकेनन् न त कुनै सरकारी पहल नै देखियो । केही सीप नलागेपछि स्थानीयको पहलमा उनीहरुलाई कर्णाली नदीमा खसाएर उद्धारको प्रयास भयो ।
पुलको जाली काटेर खच्चडलाई नदीमा खसालियो । सशस्त्र प्रहरीले बाँकी तीनवटा खच्चडलाई डोरीले बाँधेर फसेको ठाउँबाट निकालेको थियो । पानीमा खसेका ११ वटा खच्चड बाँचे तर दुईवटा भने बचेनन् । पुलबाट खसाल्दा आफ्नै शरीरमा भएको सामानको भारीले उनीहरुको प्राण लियो ।
तर कर्णाली नदीमाथिको झोलुंगे पुलमा फसेका १३ मध्ये दुईवटा खच्चडको ज्यान गयो ।
यी खच्चड अछामका जोरे रोकामगर र राजेन्द्र बोहोराका भएको जिल्ला प्रहरी कार्यालय दैलेखका प्रमुख डीएसपी सुनील दाहालले जानकारी दिनुभएको छ । जीर्ण पुलमा मानिस पनि हिँड्छन् । धन्न मानिस परेनन् भनेर कसैले सुस्केरा हालेको हुन सक्छ तर यो घटनामा ज्यान खच्चडको गयो, लज्जाबोध भने शासकहरुलाई हुनुपर्ने हो ।
सम्बन्धित समाचार...
पुलमा अड्किएका खच्चरमध्ये १० वटालाई कर्णालीमा खसालेर उद्धार
झोलुङ्गे पुलको जाली लत्रियो, १३ खच्चड पुलमै अड्किए (तस्बिरहरू)
कर्णाली पुलमा अड्किएका खच्चरको उद्धार सकियो, १३ मध्ये दुई खच्चर बाँचेनन्
