प्रधानमन्त्री दाहाल भूकम्पले क्षतिग्रस्त क्षेत्रको निरीक्षण गर्न जाजरकोटमा

काठमाडौं । प्रधानमन्त्री पुष्पकमल दाहाल भूकम्पले क्षतिग्रस्त क्षेत्र जाजरकोटको निरीक्षण गर्न त्यसतर्फ प्रस्थान गरेका छन् ।

जाजरकोट केन्द्रबिन्दु भएर मध्यराति गएको भूकम्पका कारण जनधनको क्षति भएपछि प्रधानमन्त्री दाहाल, ऊर्जा, जलस्रोत तथा सिँचाइमन्त्री शक्तिबहादुर बस्नेत र सांसद जनार्दन शर्मा केहीबेर अघि जाजरकोट गएका हुन् ।

प्रधानमन्त्री दाहालसँगै स्वास्थ्यकर्मीको टोलीसमेत प्रभावित क्षेत्र गएको प्रधानमन्त्रीको सचिवालयले जनाएको छ । सरकारले प्रभावित जिल्लाहरूमा खोज तथा अनुसन्धान गर्न तीनवटै सुरक्षा निकायलाई परिचालन गरेको छ भने सबैलाई उद्धारमा जुट्न आह्वान समेत गरेको छ ।

जाजरकोटलाई केन्द्रबिन्दु बनाएर हिजो मध्य राति ६ दशमलव ४ म्याग्निच्युडको भूकम्प गएको थियो । भूकम्पबाट अहिलेसम्म १२८ जनाको ज्यान गएको छ भने करिब १ सय ४० जना घाइते भएका छन् ।