काठमाडौं । यस वर्षको हिमाल आरोहणका लागि चैत महिनामा १४८ जनाले अनुमति लिएका छन् । जसबाट १० करोड ५५ लाख ९१ हजार चार सय रुपैयाँ राजस्व संकलन भएको पर्यटन विभागले जनाएको छ ।
आरोहीले अहिलेसम्म ९ वटा हिमाल आरोहणका लागि अनुमति लिएका छन् । जसमा सबैभन्दा बढी सगरमाथा आरोहण गर्ने ६३ जना छन् । त्यस्तै अन्नपूर्ण आरोहणको अनुमति लिने २५ जना छन् भने आमादब्लम २३ र धौलागिरिको आरोहणको अनुमति लिन १५ जना छन् ।
राजस्व संकलनमा सबैभन्दा बढी सगरमाथाबाट नौ करोड २२ लाख, अन्नपूर्णबाट ५९ लाख ६१ हजार, धौलागिरिबाट ३५ लाख ७० हजार, कञ्चनजंघाबाट १६ लाख ७७ हजार र आमादब्लमबाट १२ लाख २४ हजार रुपैयाँ राजस्व संकलन भएको छ ।
यसैबीच यस वर्ष नेपाल आउने पर्यटकको संख्या पनि वृद्धि भएको छ । एक महिना (मार्च) को अवधिमा एक लाख २८ हजार विदेशी पर्यटक भित्रिएका छन् । नेपाल पर्यटन बोर्डका अनुसार सन् २०२४ को मार्चमा एक लाख २८ हजार १६७ विदेशी पर्यटक नेपाल आएका हुन् ।
यो सन् २०२३ को तुलनामा ३० प्रतिशत र सन् २०१९ को तुलनामा १ प्रतिशतले बढी हो । सन् २०१९ मा एक लाख २७ हजार ३५१ र सन् २०२३ मा ९९ हजार ४२६ विदेशी पर्यटक नेपाल आएका थिए ।
मार्चमा सबैभन्दा बढी भारतीय ३० हजार ६९८ पर्यटक नेपाल घुम्न आएका थिए । त्यस्तै दोस्रोमा चीनबाट १२ हजार ९३, अमेरिकाबाट १० हजार ७६३, जर्मनीबाट ५ हजार २५५ पर्यटक नेपाल घुम्न आएका थिए ।
वृद्धिदरमा सबैभन्दा बढी चीनको छ । मार्चमा चीनबाट नेपाल घुम्न आउने पर्यटक वृद्धिदर ३५८ प्रतिशत छ । गत वर्षको मार्चमा दुई हजार ६३५ चिनियाँ पर्यटक नेपाल घुम्न आएकामा यस वर्षको मार्चमा भने १२ हजार ९३ जना घुम्न आएका छन् । तर अस्ट्रेलिया, पाकिस्तान र इजरायलबाट नेपाल आउने पर्यटकको संख्या तुलनात्मक रुपमा घटेको छ ।
यो पनि...
