ताप्लेजुङ । विश्वको तेस्रो अग्लो हिमाल कञ्चनजंघा, सुदूरपूर्वको हिमाली जिल्ला ताप्लेजुङको चिनारी हो ।
पाथीभरा माईको मन्दिरले पनि यो जिल्लाको ख्याती बढाएको छ । सदरमुकाम फुङलिङसम्म मात्रै पुग्ने आगन्तुकलाई भने नजिकैको सिद्धिडाँडाको आकर्षणले लोभ्याउने गरेको छ ।
ताप्लेजुङ सदरमुकाम फुङलिङबाट साढे दुई किलोमिटर दूरीमा रहेको सिद्धिडाँडा नयाँ पर्यटकीय गन्तव्यको रूपमा विकास भएको छ । यो ठाउँमा पुग्नासाथ एकनासले झरेका पाँच धारा, स्वागतद्वार र आाखा शीतल पार्ने पोखरी देख्दा आगन्तुकको मन प्रफुल्ल हुन्छ ।
सिद्धिडाँडालाई शान्त र मनोरम स्थलको रूपमा परिणत गर्ने परिकल्पना गरेका लामा गुरु गोपीमान गुरुङ यो ठाउँको थप विकास गर्दै लैजाने योजना सुनाउँछन् ।
गुरुङ भारतको दार्जिलिङमा जन्मिएका हुन् । भारतीय सेनाबाट अवकाश पाएपछि उनले ताप्लेजुङ आएर सिद्धिडाँडामा धार्मिक सहिष्णुता झल्काउने संरचना बनाउन पहल गरेका हुन् । उनको परिकल्पनालाई नेपाली सेना, सामाजिक संघसंस्था तथा सरकारी निकायले सहयोग गर्दा यो पूर्वाधार तयार भएको हो ।
सामाजिक सांस्कृतिक विविधताको प्रतिनिधित्व हुनेगरी मन्दिर, मठ, गुम्बालगायतका संरचना बनेको यो ठाउँको नौ रोपनी जग्गा स्थानीयले उपलब्ध गराएका हुन् ।
अलैचीका बोटसहितको बगैचा, सुन्दर र शान्त वातावरण भएको सिद्धिडाँडामा प्रवेश निशुल्क भएकाले दिनभरजसो आगन्तुकहरू पुगिरहेका हुन्छन् । यस ठाउँको थप प्रबर्द्धनका लागि पूर्वाधार निर्माणमा सरकारको साथ र सहयोग पाए यसले ठूलो संख्यामा पर्यटक तान्ने देखिन्छ । यससँगै सिद्धिडाँडाको प्रचारप्रसार पनि आवश्यक देखिएको छ ।
.png&w=350&height=150)
