प्यूठान । सञ्चारको सुविधासँगै पछिल्लो समय पश्चिम पहाडी जिल्लाका दुर्गम गाउँको जनजीवन सहज बनेको छ। विभिन्न कारणले घरबाहिर भएकाहरुलाई सूचना प्रविधिको बढ्दो प्रयोगले परिवारसँग जोडेको छ ।
प्यूठानको गौमुखी गाउँपालिका लिवाङका रामबहादुर पौडेल आजकल दिनँहुजसो विदेशमा रहेका छोरासँग कुराकानी गर्छन् ।
७८ वर्षका पौडेललाई विदेशमा रहेका छोराले भिडियो च्याटमार्फत कुराकानी गर्दा छोरा सँगै रहेको अनुभूत गर्छन् । बिहे गरेका छोरीहरुसंग पनि पौडेल दिनहुँजसो भिडियो च्याटमा गफिन्छन् ।
लिवाङकै रिमा बोहरालाई पनि अहिले निकै सहज भएको छ । उनी आफन्तसँग इन्टरनेटको माध्यममार्फत कुराकानी गर्छिन् । प्रविधिले दैनिकी निकै सहज भएको उनको अनुभव छ ।
प्यूठानका अधिकांश गाउँमा अहिले घरघरमा इन्टरनेट छन् । हरेक घरका मानिससँग इन्टरनेट चल्ने एन्ड्रोइड मोबाइल छ । दूरदराज मानिने गाउँहरुमा पनि डाटा लिएर नेट चलाउन सकिन्छ ।
स्थानीय सरकारले पनि दुर्गम र दूरदराजका नागरिकलाई सञ्चारको पहुँचमा ल्याउन विभिन्न कार्यक्रम सुरु गरेका छन् । सञ्चारको प्रयोग बढ्दै जाँदा सहर र गाउँबीचको दूरी कम हुँदै गएको छ ।
