काठमाडौं । आईसीसी विश्व क्रिकेट लिग टूको अन्तिम खेलमा यूएईविरुद्ध डीएल मेथडमा ९ रनको जितसँगै नेपालले जिम्बाबेमा हुने विश्वकप ग्लोबल छनोटमा स्थान बनाएको छ । नेपालका लागि लिग टूका ९ सिरिज नै रोचक बने । पछिल्ला ३ सिरिजमा ११ जित निकाल्दै नेपालले ऐतिहासिक सफलता हात पारेको हो ।
नेपालले विश्वकप छनोटको मुख्य ढोका मानिएको विश्व क्रिकेट लिग टूको यात्रा फेब्रुअरी, २०२० मा कीर्तिपुरस्थित त्रिवि मैदानबाटै सुरु गरेको थियो । नेपाल, ओमान र अमेरिका सम्मिलित पहिलो सिरिजमा नेपालले दुई जित र दुई हारको सामना गरेको थियो । त्यसपछिका दुई सिसिरिजमा समान दुई जित र दुई हारको नतिजा नकालेको नेपालले चौथो सिरिजबाट भने लय गुमाएको थियो । अमेरिका, ओमान, नेपाल सम्मिलित सिरिज खेल्दा नेपाल मात्र १ जितमा चित्त बुझाउन बाध्य बन्यो । स्कटल्यान्डमा भएको सिरिजमा पनि एक जित निकालेको नेपालले नामिबियामा भएको छैटौं सिरिजमा भने जित निकाल्नै सकेन ।
विश्व क्रिकेट लिग टुमा नेपाली क्रिकेट टोलीको कमब्याक (भिडियो रिपोर्ट)
नेपालका लागि घरेलु मैदानमा भएका पछिल्ला तीन सिरिज महत्त्वपूर्ण रहे । नेपालले नामिबिया र स्कटल्यान्डसँगको सिरिज क्लिन स्विप गर्यो । त्यसपछि यूएई भ्रमणमा तीन जित निकालेको थियो । नेपालले अन्तिम सिरिज घरेलु मैदानमा यूएई र पीएनजीविरुद्ध क्लिन स्विप गर्दै लिग टूको शीर्ष तीनमा आफूलाई राख्न सफल भयो ।
यो बीचमा नेपालका लागि चार कप्तान परिवर्तन हुँदा पाँच प्रशिक्षक परिवर्तन भए । पहिलो सिरिज खेलाएर भारतीय प्रशिक्षक उमेश पटुवाल बिदाबारी भए । त्यसपछि डेभ ह्वाटमोरको प्रशिक्षणमा खेलेको नेपालले पुबुदु दाशानायके र मनोज प्रभाकरकोसमेत प्रशिक्षण पायो । तर, मोन्टी देशाईको आगमनपछि भने नेपाली टिममा व्यापक सुधार देखियो । मोन्टीको आगमनसँगै नेपाली ब्याटिङले आशातित सुधार गरेको छ । पछिल्ला ११ खेलमा आसिफ सेखले ४ सय १८ रन बनाएका छन् भने कप्तान रोहित पौडेलले २८५ रन बनाएका छन् ।
अब नेपालले विश्वकप छनोटमा जिम्बाबे, नेदरल्यान्ड्स, ओमान, स्कटल्यान्ड तथा सुपर लिगबाट आएका श्रीलंका, दक्षिण अफ्रिका, वेस्टइन्डिज र आयरल्यान्डमध्ये ३ टिमसँग खेल्नेछ । ग्लोबल छनोटमा नामिबियामा हुने प्लेअफबाट छनोट हुने दुई टिम पनि हुनेछन् । प्लेअफमा अमेरिका, नामिबिया, यूएई, पपुवा न्युगिनी, जर्सी र क्यानडा खेल्नेछन् । यदि ग्लोबल छनोटको शीर्ष दुईमा रहन सके नेपालले विश्वकप खेल्नेछ ।
नेपालले लिग टू का ३६ खेलमा ४० अंक जोड्यो । ५० अंक बनाएको स्कटल्यान्ड पहिलो भयो भने ४४ अंकसहित ओमान दोस्रो भयो । नेपाल तेस्रो हुँदा चौथो स्थानमा रहेको नामिबियाले ३९ अंक बनायो । ३५ अंक बनाएको अमेरिका पाँचौं स्थानमा रहँदै ओडीआई मान्यतालाई निरन्तरता दिन सफल भयो । यूएई र पपुवा न्युगिनीको ओडीआई मान्यता जोगाउने बाटो घुमाउरो बन्यो । नामिबियामा हुने प्लेअफको शीर्ष दुईमा नअटाए यूएई र पीएनजीको ओडीआई पूर्णरुपमा खोसिनेछ ।
सम्बन्धित समाचार...
नेपाललाई ऐतिहासिक सफलता : यूएईलाई ९ रनले पराजित गरेसँगै विश्वकप छनोटमा स्थान सुरक्षित
नेपालको ऐतिहासिक जितमा यस्तो देखियो कीर्तिपुर क्रिकेट मैदान (फोटो फिचर)
