काठमाडौं । नेपाली राष्ट्रिय क्रिकेट टोलीका कप्तान रोहितकुमार पौडेलले एक दिवसीय मान्यता जोगिएपछि आगामी दिनमा बलियो टोलीसँग थप क्रिकेट खेल्ने मौका पाउने धारणा राखेका छन् ।
भ्रमणकारी टोली यूएईविरुद्ध आइतबार १७७ रनको फराकिलो जित निकालेपछिको पत्रकार सम्मेलनमा कप्तान रोहितले एक दिवसीय मान्यतपछि नेपालले बलियो टोलीसँग खेल्दै थप अनुभव बटुल्ने मौका मिल्ने जनाए ।
उनले विश्वकप छनोट पुग्न थप दुई खेलमा सुखद् नतिजा निकै महत्त्वपूर्ण रहेको भन्दै ती खेलमा पनि केन्द्रित हुने प्रतिक्रिया दिए । टोलीमा नयाँ प्रशिक्षक मोन्टी देशाई आएसँगै खेलाडीलाई खुलेर खेल्ने अवसर भएको सोहीअनुसार सबै खेलाडीले मिहिनेतका साथ खेल्दा सफलता मिलेको कप्तान रोहितको भनाइ छ । एक दिवसीय मान्यता कायम भएसँगै नेपाली क्रिकेट थप व्यस्त हुने र धेरैभन्दा धेरै खेलाडीले मौका पाउने उनले जनाए ।
यस्तै नेपाली टोलीका प्रशिक्षक मोन्टी देशाईले नेपाल क्रिकेट संघसँग जोडिएको दिनदेखि टोली बनाउन लागेको र अहिलेसम्मको यात्रा सुखद् भएकामा खुसी व्यक्त गरे । आफ्नो रणनीति हरेक खेलमा सफल हुने गरेको र खेलाडीलाई दिइएको भूमिकालाई खेलाडीलाई राम्रोसँग निभाएको उनको प्रतिक्रिया थियो । खेलअघि केही कठिन निर्णय गर्नुपरेको र रणनीति बनाउँदा आफू सफल भएकामा उनले खुसी व्यक्त गरे ।
यता खेलमा सर्वाधिक पाँच विकेट निकालेका स्पिनर ललितनारायण राजवंशीले जितको सदस्य बन्दा खुसी लागेको प्रतिक्रिया दिए । उनले आफू टिमबाहिर रहे पनि टोलीको जितमा निकै खुसी भएको र टिम पर्नैपर्ने आकंक्षा आफूमा नभएको जनाए । एक दिवसीय मान्यता पाएसँगै नयाँ खेलाडीले अवसर पाउने र नेपालले अन्य बलिया टोलीसँग अनुभव बटुल्ने अवसर मिल्ने उनको भनाइ छ ।
यस्तै गुल्सन झाले पनि प्रशिक्षकले दिलाएको भूमिकामा आफूले न्याय दिन सकेकोमा खुसी व्यक्त गरे ।
लिग टूअन्तर्गत नेपालले अब दुई खेल खेल्न बाँकी छ । यसैअन्तर्गत नेपालले सोमबार अर्को भ्रमणकारकी टोली पपुवा न्युगिनी (पीएनजी) सँग खेल्नेछ । नेपालले अब दुई खेलमा सुखद् नतिजा निकाले विश्वकप छनोट खेल्ने मौका बनाउनेछ ।
यूएईविरुद्ध नेपालको शानदार जित, जाेगियो एकदिवसीय मान्यता
