काठमाडौं । आईसीसी विश्व क्रिकेट लिग टूअन्तर्गत यूएईविरुद्धको आजको खेलमा नेपाल १७७ रनले विजयी भएको छ ।
कीर्तिपुरस्थित त्रिवि क्रिकेट मैदानमा टस जितेर नेपालले पहिला ब्याटिङ रोजेको थियो । ४९.२ ओभरमा अल आउट भएको नेपालले यूएई २४९ रनको लक्ष्य दिएको थियो ।
जवाफी ब्याटिङमा उत्रिएको यूएईले राम्रो प्रदर्शन गर्न सकेन । ७१ रन बनाउँदै यूएई २२.५ ओभरमा अलआउट भयो ।
जारी सिरिजमा यो नेपालको लगातार दोस्रो जित हो । जितसँगै नेपालले एकदिवसीय अन्तर्राष्ट्रिय मान्यतालाई सन् २०२७ सम्म निरन्तरता दिएको छ ।
ब्याटिङमा राम्रो प्रदर्शन गर्न नसकेको यूएईका ओपनर भ्रिटिया अरभिन्द खाता नखोली मैदानबाट बाहिरिए । अर्का ओपनर असिफ खान पनि चल्न सकेनन् । उनी १२ बल खेल्दै ६ रन बनाएर आउट भए ।
आयान अफ्जल खानले ३३ बलमा २९ रन बनाए । उनले दुई चौका र दुई छक्का प्रहार गरे । अस्वान्थ भल्थापाले १४ र पलानियापन मैयप्पनले ११ रन बनाउँदा अरु खेलाडीले दोहोरो रन बनाउन सकेनन् ।
नेपालका तर्फबाट ललित राजवंशीले सर्वाधिक ५ विकेट लिए । सन्दीप लामिछानेले २ तथा सोमपाल कामी, दीपेन्द्रसिंह ऐरी र गुल्सन झाले समान १/१ विकेट लिए ।
पहिला ब्याटिङ रोजेको नेपालले सुखद सुरुवात गर्न सकेको थिएन । दोस्रो ओभरमा पहिलो विकेट गुमाएको थियो । आयान लाक्राको बलमा बोल्ड हुँदै आसिफ सेख खाता खोल्न नपाइ पेभेलियन फर्किए । चार दशमलव तीन ओभरमा अर्का ओपनर कुशल भुर्तेल मैदान बाहिरिए । सुरुवाती तीन ब्याटरले दोहोरो बनाउन नपाई मैदान बाहिरिएपछि धर्मराएको नेपाललाई कप्तान रोहित पौडेल र भीम सार्कीले सम्हाले ।
भीम ३७ बलमा ४ चौका हान्दै २९ रनमा आउट भए । कठिन स्थितिमा रोहितले ११२ बलमा ७७ रन जोडेर पभेलियन फर्किए ।
यूएईका लागि आयन अफ्जल खान, जहुर खान, रोहन मुस्ताफा र जवर फरिदले समान २/२ विकेट लिएर भने आर्यन लाक्रा, जुनैद सिद्दिकीले १/१ विकेट लिए ।
अब नेपालले तेस्रो खेल भोलि (सोमबार) पीएनजीसँग र अन्तिम खेल बिहीबार यूएईसँग खेल्नेछ ।
