जनकपुर । मधेश प्रदेशको मुख्यमन्त्रीमा एमालेका सरोजकुमार यादवको नियुक्तिविरूद्ध नेपाली कांग्रेससहित सात राजनीतिक दल रिट लिएर सर्वोच्च अदालत जाने भएका छन् ।
मधेश प्रदेशकी प्रदेश प्रमुख सुमित्रा सुवेदी भण्डारीले साेमबार बिहान महोत्तरीको बर्दिबासको पानस कटेज पुगेर संविधानको धारा १६८ को उपधारा ३ बमोजिम मधेश प्रदेशको मुख्यमन्त्रीमा ठूलो दलको हैसियतले एमाले संसदीय दलका नेता सरोज यादवलाई नियुक्त गर्नुभएको थियो । तर सात दलले भने धारा १६८ को उपधारा २ बमोजिम नै सरकार गठनको आह्वान गर्न मागसहित सर्वोच्चमा रिट निवेदन दिने निर्णय गरेका हुन् ।
नेपाली कांग्रेस, जसपा नेपाल, जनमत पार्टी, लोसपा, माओवादी केन्द्र, नेकपा एकीकृत समाजवादीलगायतका दलले प्रदेश प्रमुखको निर्णयविरूद्ध अदालत जाने निर्णय गरेका हुन् । यसैबीच, मधेशमा मुख्यमन्त्री नियुक्तिपछि बढेको विवादलाई लिएर असन्तुष्ट दलका नेता र कार्यकर्ताले मधेश प्रदेश प्रमुखको कार्यालय र मुख्यमन्त्री कार्यालयमा तोडफोड गरेका छन् । उनीहरूले प्रदेश प्रमुख सुमित्रा भण्डारीको राजीनामा पनि मागेका छन् ।
बिरामीको बहाना गर्दै जनकपुर छोडेकी प्रदेश प्रमुख भण्डारीले साेमबार बिहान बर्दिबासको पानस कटेज पुगेर यादवलाई मुख्यमन्त्रीमा नियुक्त गरेपछि चौतर्फी आलोचना भएको छ । बर्दिबासको कालापानीस्थित होटल पानसमा साेमबार झिसमिसेमै बिहान ५ बजेर २० मिनेटमा यादवलाई मुख्यमन्त्री पदको सपथसमेत गराइएको थियो ।
होटलमै एमाले प्रदेशसभा सदस्य लखन दास तत्मा, नेपाल संघीय समाजवादी पार्टीकी प्रदेशसभा सदस्य बिमला अन्सारी र राप्रपाकी प्रदेशसभा सदस्य कञ्चन बिच्छालाई विना-विभागीय मन्त्रीको सपथ पनि गराइएको छ । यसअघि प्रदेश प्रमुख भण्डारीलाई कांग्रेससहित सात दलले संविधानको धारा १६८ को उपधारा २ बमोजिम दुई वा दुई भन्दा बढी दलले सरकार बनाउन भन्दै आह्वान गर्न दबाब दिइरहेका थिए ।
एमालेले पनि संविधानको धारा १६८ को उपधारा ३ बमोजिम सरकार गठन हुनुपर्ने भन्दै जनकपुरस्थित प्रदेश प्रमुखको कार्यालयमा नाराबाजी गरेको थियो । आइतबार साँझ प्रदेश प्रमुख भण्डारीले नेपाली कांग्रेस, माओवादी, लोसपा, नेकपा एस, जनमत र जसपाका प्रदेशसभा सदस्यहरुसँग भेटर २-३ जना विज्ञहरूसँग छलफल गरी मात्रै निर्णय लिने प्रतिबद्धता जनाउनुभएको थियो । तर साेमबार बिहान ३ बजे उपचारका लागि काठमाडौं जान लागेको भन्दै जनकपुरस्थित मधेश प्रदेश प्रमुखको भवनबाट निस्केर उहाँ बर्दिबासको होटलमा पुग्नुभएको थियो ।
रातारात होटलमा बसेर मुख्यमन्त्रीमा एमालेका यादवलाई नियुक्त गर्दा त्यहाँ पनि उहाँको विरोध भएको थियो । उपचारको बहानामा भागेर कटेजमा कार्यालय स्थापना गरेर मुख्यमन्त्री नियुक्ति गरिएकोमा प्रदेश प्रमुख भण्डारीको आलोचना भइरहेको छ ।
याे पनि :
