काठमाडौं । आगामी आर्थिक वर्षको बजेट पर्सि जेठ १५ गते दिउँसो १ बजे आउने भएको छ । सभामुख देवराज घिमिरेले बजेट वक्तव्य प्रस्तुत गर्न १५ जेठको दिउँसो १ बजे संघीय संसद्को संयुक्त बैठक बोलाउनुभएको हो ।
बजेट पेस हुने दिन पौने १ बजे नै आइपुग्न पनि सभामुख घिमिरेले सांसदहरुलाई आग्रह गर्नुभएको छ । आगामी आर्थिक वर्षको बजेट अर्थमन्त्री वर्षमान पुनले प्रतिनिधिसभा र राष्ट्रिय सभाको संयुक्त बैठकमा पेस गर्नुहुनेछ । नयाँ बजेट जेठ १५ गते ल्याउने संवैधानिक व्यवस्था छ । प्रतिनिधिसभा बैठक भने १५ गते ४ बजे बोलाइएको छ ।
यसैबीच आजको प्रतिनिधिसभा बैठकमा सरकारको नीति तथा कार्यक्रम पनि पारित भएको छ । प्रमुख प्रतिपक्ष नेपाली कांग्रेसको नाराबाजीकै बीच सरकारको नीति तथा कार्यक्रम बहुमतले पारित भएको छ ।
आजै अर्थमन्त्री पुनले प्रतिनिधिसभाको वेलमा कांग्रेस सांसदहरूले नाराबाजी गरिरहेकै बेला आर्थिक वर्ष ०८०/८१ को आर्थिक सर्वेक्षण र सार्वजनिक संस्थाको वार्षिक स्थिति समीक्षा पेस गर्नुभएको थियो ।
नाराबाजीकै बीच अर्थमन्त्रीको बाटो छेकिरहेका कांग्रेस सांसदहरूलाई सत्तारुढ एमाले, माओवादी र रास्वपाका सांसदहरूले धकेलेर रोस्टममा जान सघाएका थिए ।
रास्वपा सांसद स्वर्णिम वाग्लेले विपक्षको विरोधलाई लज्जास्पद र औचित्यहीन भनेपछि होहल्ला थप बढेको थियो ।
आजको प्रतिनिधिसभा बैठक सुरु भएलगत्तै राप्रपाका प्रमुख सचेतक ज्ञानबहादुर शाहीले सहकारीको बचत अपचलनकर्ता उपप्रधानमन्त्री तथा गृहमन्त्री रवि लामिछानेमाथि छानबिन हुनुपर्ने माग गर्नुभएको थियो ।
आजै राष्ट्रिय सभाको बैठक पनि बसेको छ ।
