काठमाडौं । संसद्को राज्य व्यवस्था तथा सुशासन समितिले एनसेलको सेयर खरिद-बिक्री प्रकरणमा प्रधानमन्त्री पुष्पकमल दाहाललाई बोलाएर छलफल गर्ने निर्णय गरेको छ ।
सिंहदरबारमा आज (शुक्रबार) बसेको समितिको बैठकले प्रधानमन्त्री दाहाललाई बोलाएर एनसेल कर छलीबारे छलफल गर्ने निर्णय गरेको सभापति रामहरि खतिवडाले जानकारी दिए ।
बैठकमा सदस्यहरुले एनसेल कर छलीको विषय राजनीतिक मिलेमतोमा भएको भन्दै अनुसन्धानलाई अघि बढाउन माग गरेका थिए ।
बैठकमा जनता समाजवादी पार्टीका अध्यक्ष उपेन्द्र यादवले एनसेलको सेयर खरिद-बिक्री प्रकरणमा राजनीतिक र प्रशासनिक नेतृत्वको स्वार्थ जोडिएको दाबी गरेका छन् । उनले विगतमा पनि सरकारले एनसेलले अर्बौं रुपैयाँ कर मिनाहा गरेको कुरा आए पनि त्यसप्रति कसैको चासो नभएको धारणा राखे ।
यस प्रकरणमा आवश्यक छानबिन गर्नुपर्ने भन्दै देशमा सुशासनको अवस्था अत्यन्त नाजुक भएको अध्यक्ष यादवको भनाइ छ । उनले आफ्नो जीवनकालमा अहिलेजस्तो सुशासनको अवस्था बिग्रिएको कहिल्यै नदेखेको पनि जिकिरसमेत गरे ।
‘एकपटक सुनिएको थियो एनसेलको अर्बौंको कर मिनाहा गर्यो सरकारले । त्यतिबेला कुरा उठ्यो तर चासो कसैको अगाडि बढेन । एनसेल प्रकरणमा राजनीतिक नेतृत्व र प्रशासनिक नेतृत्वको स्वार्थ जोडिएको जस्तो देखिन्छ पटक-पटक,’ अध्यक्ष यादवले भने, ‘देशमा सुशासनको अवस्था अत्यन्त नाजुक छ । आफूले भोगेको अहिलेसम्म हेरेकामा यत्तिको सुशासन बिग्रिएको अनुभव मैले कहिल्यै गरेको थिइनँ जुन अहिलेको अवस्थामा म देख्दै छु ।’
बैठकमा सदस्यहरुले अर्थ र सार्वजनिक लेखा समितिले समेत एनसेलबारे अध्ययन गरिरहेको भन्दै समितिको क्षेत्राधिकारबारे प्रश्न उठाएका थिए ।
एनसेल सेयर प्रकरणमा राजनीतिक र प्रशासनिक नेतृत्वको स्वार्थ जोडिएको छ : अध्यक्ष यादव
