बारा । पानी बिक्रीको रकम हिनामिना गरेको कारण जागिरबाट हटाइएको व्यक्तिगत रिसइबीको कारण बारामा पानी उद्योगका व्यवस्थापक रामकिशोर सिंहको हत्या भएको प्रहरीको प्रारम्भिक अनुसन्धानबाट खुलेको छ ।
बाराको प्रसौनी गाउँपालिका-६ मा रहेको नेपाल निर पानीका ५० वर्षीय व्यवस्थापक रामकिशोर सिंहको मंसिर ११ गते बेलुकी उद्योगबाट करिब २५ मिटर टाढा खाल्डोमा धारिलो हतियार प्रयोग गरी हत्या गरिएको अवस्थामा शव फेला परेको थियो । घटनामा संलग्न रहेको आशंकामा पर्सा जिल्लाको वीरगञ्ज महानगरपालिका-२२ मनियारी निवासी २१ वर्षीय राजनकुमार राम र सोही स्थानका ३२ वर्षीय प्रमोद साह तुरहालाई प्रहरीले पक्राउ गरेको हो ।
जिल्ला प्रहरी कार्यालय बाराका निमित्त प्रवक्ता तथा प्रहरी निरीक्षक खेमप्रसाद नेपालका अनुसार राजनकुमार राम उद्योगमा चालकको रूपमा कार्यरत हुँदा उद्योगले तोकेको प्रतिजार पानीको बिक्री मूल्य ११० रूपैयाँ भन्दा बढी मूल्यमा बजारमा १ सय १५ देखि १ सय २० रूपैयाँसम्म बिक्री गरी व्यक्तिगत नाफा लिएको कुरा व्यवस्थापक सिंहले थाहा पाएपछि मंसिर १० गते राजनकुमारलाई कामबाट हटाइएपछि दुवैबीच गम्भीर विवाद चर्किएको भएको र त्यसकै रिसइबीका कारण राजनकुमारले आफ्ना साथी प्रमोद साह तुरहासँग मिलेर हत्याको योजना बनाएको अनुसन्धानबाट खुलेको छ ।
प्रहरीका अनुसार दुवै अभियुक्तले वीरगञ्जमा बसेर जाँड-रक्सी सेवन गरेपछि योजनाबद्ध रूपमा उद्योग परिसर पुगेर फलामको धारिलो छुरा प्रयोग गरी सिंहको हत्या गरेका थिए । हत्यापश्चात् फरार रहेका राजनकुमार रामलाई जिल्ला प्रहरी कार्यालय बाराको टोलीले पर्सा जिल्ला प्रहरीसँगको समन्वयमा छिपहरमाई गाउँपालिका-५ भिस्वा नाकाबाट भारततर्फ भाग्दै गरेको अवस्थामा नियन्त्रणमा लिएको र प्रमोद साह तुरहालाई वीरगञ्ज महानगरपालिका-२२ मा लुकिछिपी बसेको अवस्थामा घटनापछि करिब १६ घन्टा भित्र पक्राउ गरिएको प्रहरीले जनाएको छ।
पक्राउ परेको दुबै अभियुक्तहरूमाथि बारा जिल्ला अदालतबाट सात दिनको म्याद थप गरी अनुसन्धान अघि बढाइएको जिल्ला प्रहरी कार्यालय बाराले जनाएको छ ।
सम्बन्धित समाचार :
