काठमाडौं । नेपाल मिडिया सोसाइटीका अध्यक्ष शुभशंकर कँडेल समाचार प्रकाशन गरेकै आधारमा गिरफ्तार गर्नु पुष्पकमल दाहाल सरकारको मूर्खता भएको बताउनु्भएको छ । उहाँले मिडियामाथिको आक्रमण सह्य नहुने पनि बताउनुभयो ।
कान्तिपुर मिडिया ग्रुपका अध्यक्ष कैलाश सिरोहियालाई गिरफ्तार गर्न कान्तिपुर मुख्यालयमै प्रहरी पुगेपछि कँडेलले यस्तो प्रतिक्रिया दिनुभएको हो । उहाँले सत्ता र शक्तिको दुरुपयोग भएको पनि बताउनुभयो ।
यस्तै नेपाल पत्रकार महासंघका अध्यक्ष विपुल पोखरेलले पनि कान्तिपुर मिडिया ग्रुपका अध्यक्ष सिरोहियामाथि बलजफ्ती गिरफ्तार गरेकामा आपत्तिसमेत जनाउनुभयो । यस्तै वरिष्ठ पत्रकार युवराज घिमिरे उपप्रधानमन्त्री तथा गृहमन्त्री रवि लामिछानेको नियोजित षड्यन्त्र रहेको बताउनुभएको छ ।
यसैगरी नेपाल प्रेस युनियनका अध्यक्ष शिव लम्सालले पनि सिरोहिया पक्राउको घटना निन्दनीय र गृहमन्त्रीको इगोका रुपमा बुझ्न सकिने बताउनुभयो । नेपालको पत्रकारितालाई निमोठ्ने, मार्ने काम भएको उहाँको भनाइ छ । ‘राज्यले नांगो नाच देखायो, सिरोहियालाई पक्राउ गर्नु निन्दनीय छ,’ उहाँले भन्नुभयो ।
यस्तै नेपाल पत्रकार महासंघका वरिष्ठ उपाध्यक्ष रमेश विष्टले सरकारको यो कदमको विरुद्धमा आफूहरु रहेको बताउनुभएको छ । ‘सरकारले लोकतन्त्र र प्रेस स्वतन्त्रताको उपहास गर्यो,’विष्टले भन्नुभयो । महासंघ सरकारको यो कदमको विरुद्धमा उत्रिने पनि प्रतिक्रिया दिनुभयो ।
यो पनि...
