चितवन । चितवनको भरतपुर महानगरपालिका बासिन्दाले भौतिक पूर्वाधारमा नमुना काम भए पनि नगरबासीको जीवनस्तर उकास्ने योजना र काममा भने अपेक्षाअनुसार काम हुन नसकेको गुनासो गरेका छन् ।
कान्तिपुर टेलिभिजनको कार्यक्रम महानगर महाबहस कार्यक्रममा सहभागीहरूले विद्यार्थी तथा किसानका लागि सहुलियत कार्यक्रम प्रभावकारी हुन नसकेमा पनि दुखेसो गरे । नगर प्रमुख रेनु दाहालले भने आफ्नो प्रतिवद्धता अनुसार काम भएको तर केही महत्वपुर्ण कामको भने नतिजा आउन बाँकी रहेको स्वीकार गर्नुभएको छ ।
भरतपुर महानगरपालिकाले भौतिक पूर्वधार विकासमा गरेको कामबाट महानगरबासी सन्तुष्ट देखिएका छन् । तर जीनस्तर वृद्धिका लागि हुनुपर्ने जति काम हुन नसकेकोमा भने उनीहरुको दुखेसो छ । किसान तथा विद्यार्थीले समेत आफूअनुकूलका कार्यक्रमको अपेक्षा गरेका छन् ।
भरतपुर महानगर प्रमुख दाहालले भने आफूले निर्वाचनका बेला प्रतिबद्धता जनाएका विषयमा काम गरेको दाबी गर्नुभयो । उहाँले यसको जस सकारात्मक तथा नकारात्मक हिसाबले खबरदारी गर्ने महानगरबासीलाई दिनुभएको छ । नगर प्रमुख दाहालले महानगरको फोहोर व्यवस्थापनको विषयमा भने आफूले चाहेअनुसार काम गर्न नसकेको स्वीकार गर्नुभयो ।
प्रमुख दाहालले महानगरबासीका कतिपय प्रवृत्तिबाट भने आफु हायलकायल भएको भन्दै असन्तुष्टि जनाउनुभयो । सकारात्मक कामसमेत भ्रम फैलाउनेहरुप्रति सजक हुनसमेत प्रमुख दाहालले महानगरबासीसँग अनुरोध गर्नुभयो । पर्यटकीय गन्तव्य भरतपुरलाई थप व्यवस्थित र सांस्कृतिक धार्मिक महानगरको रुपमा विकास गर्नसमेत थप पहल लिन महानगरलाई स्थानीयको आग्रह छ ।
विस्तृत कार्यक्रम भिडियोमा हेर्नुहोस् :
हेर्नुहोस् वीरगंज उपमहानगरको 'महानगर महाबहस'
हेर्नुहोस् जनकपुरधाम उपमहानगरको 'महानगर महाबहस'
हेर्नुहोस् विराटनगर महानगरको 'महानगर महाबहस'
