फायरसाइडमा सीके राउतको खुलासा : प्रधानमन्त्री र गृहमन्त्रीले मेयर बालेनलाई पक्राउ गर्न गोप्य बैठक नै बोलाएका थिए

काठमाडौं । जनमत पार्टीका अध्यक्ष सीके राउतले गत भदौमा काठमाडौं महानगरपालिकाका मेयर बालेन्द्र साह (बालेन) लाई पक्राउ गर्ने विषयमा प्रधानमन्त्री पुष्पकमल दहाल र तत्कालीन गृहमन्त्री नारायणकाजी श्रेष्ठले तयारी गरेको खुलासा गरेका छन् ।

कान्तिपुर टेलिभिजनको साप्ताहिक कार्यक्रम फायरसाइडमा बोल्दै राउतले गत भदौमा मेयर बालेनले '...सिंहदरबारमा आगो लगाइदिन्छु, याद राख चोर सरकार' भन्ने स्टाटस सामाजिक सञ्जालमा पोस्ट गरेपछि सुरक्षा निकायका प्रमुखहरुलाई राखेर प्रधानमन्त्री र गृहमन्त्रीले पक्राउ गर्ने विषयमा गोप्य छलफल चलाएको खुलासा गरेका हुन् । ‘बडो गोप्य तरिकाले बैठक बसेको थियो । किन हो, एजेन्डा केही थाह छैन, हामी गयौँ,’ राउतले खुलासा गरे, ‘ त्यहाँ प्रधान सेनापति, प्रहरी प्रमुखदेखि लिएर तीनवटै जिल्लाका सीडीओहरू थिए ।’

बैठक बोलाउनुको कारण काठमाडौं महानगरका मेयर बालेन्द्र शाहलाई पक्राउ गर्ने भन्ने विषय रहेको त्यसपछि मात्र थाह पाएको उनले बताए । अध्यक्ष राउतले सुनाए, ‘त्यो दिन मैले पहिलोचोटि ‘रियलाइज’ गरेँ कि लोकतान्त्रिक शक्ति कस्तो हुन्छ र बाम्पन्थी शक्ति कस्तो हुन्छ भनेर ।’

‘त्यो बेला सम्माननीय प्रधानमन्त्रीज्यूले मलाई सोध्नु भयो– के गर्ने भनेर,’ राउतले सुनाउँदै गए, ‘मैले भनेँ- कुनै पनि हालतमा उहाँलाई पक्राउ गर्नु हुँदैन भनेर ।’ मेयर बालेन्द्रको उक्त फेसबुक स्टाटसमा आएका प्रतिक्रियाहरू हेर्न आफूले प्रधानमन्त्रीलाई सुझाएको पनि उनले बताए । ‘सवा लाख जति कमेन्ट आएका छन्, कमेन्ट- त्यसमा ९५ प्रतिशतले त सरकारलाई नै गाली गरेका छन्,’ सो कुरा सम्झाउँदै यस्तो अवस्थामा बालनलाई कुनै पनि हालतमा पक्राउ गर्नु हुँदैन भनेर आफूले दाहाललाई सम्झाएको पनि बताए ।

बैठकमा सहभागी हुन गएका कांग्रस सभापति शेरबहादुर देउवाले सो विषयमा अडान लिएको अध्यक्ष राउतले बताए । ‘यस्तो बोलिराख्छन् । लोकतन्त्र हो- बोल्दैमा कहाँ आगो लगाइदिए त ? बोल्न पाउनुपर्छ भन्ने अडान त्यतिबेला उहाँले लिनु भएको थियो,’ राउतले सभापति देउवाले बैठकमा भनेको सुनाए । ‘लोकतान्त्रिक शक्ति र बाम्पन्थी शक्तिमा त्यहाँ फरक देखिन्छ हेर्नुस्,’ राउतले थपे ।

राउतले आफ्नो दल सत्ता गठबन्धनमा सामेल नहुने पनि स्पष्ट पारेका छन् । गठबन्धन दलहरुबाट सरकारमा सहभागी हुन निम्तो आए पनि त्यसका लागि आफूहरु तयार नरहेको राउतको भनाइ छ । 

माथि भिडियोमा हेर्नुहोस् राउतसँग गरिएको विस्तृत कुराकानी :- 

सम्बन्धित समाचार....

काठमाडौं महानगरका मेयर बालेनले दिए सिंहदरबारमा आगो लगाउने धम्की