काठमाडौं । विद्रोहको घोषणा गर्दै मस्कोतर्फ अगाडि बढेको रुसको निजी सैन्य समूह वाग्नर पछाडि हटेको छ ।
रुसको रोस्तोभ सहरमाथि नियन्त्रण कायम गरेको वाग्नर समूह पछिल्लो २४ घण्टाभित्रै नाटकीय रुपमा पछि हटेको हो ।
राष्ट्रपति भ्लादिमिर पुटिनको २२ वर्षे शासनमा सबैभन्दा ठूलो चुनौती खडा गरेको विद्रोही फौजका कमान्डर यभ्गेनी प्रिगोजिनले मस्कोतर्फको यात्रा रोक्न आदेश दिएका हुन् ।
वाग्नर समूहका सैनिकहरु नियन्त्रणमा लिएको भनिएको रोस्तोभ सहरबाट पनि बाहिर निस्कन थालेका छन् । रक्तपात हुन सक्ने अवस्थालाई ध्यानमा राखेर तत्काललाई आफ्नो सेनालाई फिर्ता बोलाइएको प्रिगोजिनले जनाएका छन् ।
वाग्नर समूहका सैनिक मस्कोतर्फ अगाडि बढिरहेको अवस्थामा रुसको छिमेकी तथा समर्थक देश बेलारुसले मध्यस्थता गरेको हो । बेलारुसका राष्ट्रपति अलेक्जेन्डर पेरोसेन्कोले वाग्नर समूहको नेतृत्व गरिरहेका प्रिगोजिनलाई थप अगाडि बढ्नबाट रोक्न सफल भएको अन्तर्राष्ट्रिय सञ्चारमाध्यमहरुले उल्लेख गरेका छन् । पेरोसेन्को र प्रिगोजिनबीच लामो वार्ता भएको थियो ।
रुसको सरकारी सञ्चारमाध्यमकाअनुसार प्रिगोजिन अब बेलारुस जाने छन् । वाग्नर समूहमाथि लगाइएको विद्रोहको आरोप फिर्ता लिन रुस तयार भएपछि प्रिगोजिन आफ्ना सैनिकलाई फिर्ता बोलाउन सहमत भएको उल्लेख गरिएको छ । वाग्नर समूह फिर्ता हुन थालेसँगै रुसमाथिको सम्भावित संकट टरेको अन्तर्राष्ट्रिय सञ्चारमाध्यमले जनाएका छन् ।
वाग्नर समूह रुसी सरकारले भाडामा प्रयोग गर्दै आएको सैन्य दस्ता हो । यो समूहले हाल रुसी सरकारी सेनासँग मिलेर युक्रेनविरुद्धको लडाइँ लडिरहेको छ । रुसी सरकारी सेनाले आफ्नो शिविरलाई लक्षित गरी मिसाइल प्रहार गरेको भन्दै वाग्नर समूहले रुसी सैन्य नेतृत्वको आलोचना गर्दै आएको छ । यस समूहका प्रमुख नेता प्रिगोजिनले न्यायको लागि आफ्नो समूहले लडाइँ लड्नु परेको बताएका छन् ।
वाग्नर समूहका सैनिक मस्कोतर्फ अगाडि बढेसँगै मस्कोमा हलचल मच्चिएको थियो । साथै राष्ट्रपति पुटिनले मस्को छाडेको पनि अफवाह फैलिएको थियो । फ्लाइट ट्रयाकिङ डाटामार्फत दुई विशिष्ट विमानले उडान भरेको जानकारी प्राप्त भएसँगै यस हल्लामा थप बल पुगेको थियो । यद्यपि, पुटिनका प्रेस सचिवले उनी क्रमलिनमै रहेको जनाएका थिए ।
युक्रेनमा युद्धरत वाग्नर समूहका लडाकु शिविर छाडेर रुसतर्फ लागेका थिए । योसँगै युक्रेन युद्धकाबीच रुसी सेना र वाग्नर समूहबीच टकराबको अवस्था सिर्जना भएको हो । यसका साथै वाग्नर समूहको गतिविधिसँगै चेचन्याको विशिष्ट सैन्य बल पनि मस्को तर्फ अगाडि बढ्ने खबर आएको थियो । आवश्यकता परेको खण्डमा चेचन लडाकु वाग्नर समूहको लडाकुको प्रतिकार गर्न तयार थिए । यद्यपि, सेना फिर्ता गर्ने वाग्नर समूहको घोषणासँगै रुसको सम्भावित संकट टरेको विश्लेषण भइरहेको छ ।
यो पनि...
रुसी २ सैन्य केन्द्र कब्जामा लिएको वाग्नर समूहको दाबी, कारबाही गर्ने मस्कोको चेतावनी
