काठमाडौं । नेपाली चलचित्र कलाकार संघको नेतृत्वका लागि मोहन निरौलासहितको प्यानल घोषणा भएको छ । सह-कोषाध्यक्षमा निरौला प्यानलकी पवित्रा आचार्य निर्विरोध निर्वाचित भएकी छन् ।
काठमाडौंमा बिहीबार पत्रकार सम्मेलन गरी यसबारे जानकारी गराइएको हो । निरौलाको प्यानलबाट उपाध्यक्षमा धनबहादुर बम्जन (डीबी) र कविता गेलाल छन् । महासचिवमा सविन श्रेष्ठ तथा सचिवमा रामेश्वर बुर्लाकोटी छन् । त्यस्तै कोषाध्यक्षमा सुनील कटुवाल छन् ।
यस्तै सदस्यहरुमा उद्धवप्रसाद भट्टराई, गोपाल ढकाल, शीतल केसी, पवन केसी, रोशन श्रेष्ठ, पुण्यप्रसाद पाण्डे, पुकार भट्टराई, नम्रता खरेल, रामशरण जंगम, बबिता ढकाल, सुनीलकुमार पुरी, गोपीलाल तामाङ, निर्मल स्याङ्तान र समीर लामा छन् ।
अध्यक्ष पदका उम्मेदवार निरौलाले कलाकार संघको भवन तथा कार्यालय व्यवस्थापन, सदस्यतासहित सामाजिक सुरक्षा, वृत्तिविकासलाई आफ्नो एजेन्डा बनाएका छन् । निरौला संघका वर्तमान उपाध्यक्ष तथा प्रवक्तासमेत हुन् । कार्यक्रममा उम्मेदवार निरौलाले लैंगिक तथा यौन हिंसाविरुद्ध शून्यसहनशीलताको नीति लिने, मातृभाषी चलचित्रका कलाकारलाई संघमा आबद्ध गराउने नीति लिने प्रतिबद्धता जनाए । उनले विभिन्न देशमा रहेका मौजुदा शाखाको विस्तार गरी विश्वभर छरिएका कलाकारहरुलाई एक सूत्रमा बाँध्ने आफ्ना एजेन्डा रहेको जानकारी दिए ।
कार्यक्रममा वरिष्ठ अभिनेत्री वसुन्धरा भुसालले महिला र पुरुष भनेर टुट्नु नहुने धारणा राखिन् । उनले अध्यक्ष पदमा उठ्ने अर्को पक्षलाई उम्मेदवारी फिर्ता लिएर निरौलालाई सघाउन आग्रह पनि गरिन् । नयाँ मात्रै आएर नेतृत्व सम्हाल्न नसकिने भुसालको धारणा छ ।
त्यस्तै वरिष्ठ अभिनेत्री लक्ष्मी गिरीले कलाकार संघ भनेको लिने नभइ दिने ठाउँ रहेको जनाइन् । सबै मिलेर कलाकार संघको अध्यक्षमा उम्मेदवार निरौलालाई जिताउन आवश्यक रहेको धारणा राखिन् । कलाकार संघको अध्यक्षमा बुधबार रेजिना उप्रेतीले पनि प्यानल घोषणा गरेकी छन् । कलाकार संघको नेतृत्वका लागि शनिबार चुनाव हुँदै छ ।
चलचित्र कलाकार संघको अध्यक्षमा रेजिना उप्रेतीसहितको प्यानल घोषणा
