दाङ । शिक्षा ऐन नलिई नफर्कने अडानमा देखिएका शिक्षक आफ्नो सेवा-सुविधा बढेपछि आन्दोलन समाप्त गरेर फर्किएका छन् । यसबारेमा के भन्छन् अभिभावक र विद्यार्थी ?
शिक्षकहरु विद्यालयमा फर्किदै गर्दा शुक्रवारदेखि नै विद्यार्थी कक्षाकोठामा हुन्छन् कि हुँदैनन् द्विविधा छ । आन्दोलनका लागि काठमाडौं पुगेका शिक्षकहरु शुक्रबार नै विद्यालय पुग्छन कि पुग्दैनन् अर्को द्विविधा अभिभावकलाई छ ।
शिक्षा ऐन जारी गर्नुपर्ने लगायतका माग राखेर आन्दोलनमा लागेका शिक्षकहरुले आफ्नो पेशागत शुनिश्चिततासँगै विद्यालयको शैक्षिक वातावरण सुधार र विद्यार्थीको शैक्षिक गुणस्तर सुधारमा कत्तिको ध्यान पुर्याउँछन् अभिभावकहरु कुरिरहेका छन् ।
बैसाख ११ गतेदेखि हुने भनिएको कक्षा १२ को परीक्षा २१ वैशाखबाट हुने भनिएको छ । १२ को परीक्षा र अन्य विद्यार्थीको पठनपाठनलाई एकैसाथ लैजानुपर्ने चुनौती विद्यालय र शिक्षकहरुमा छ ।
तोकिएको समयमा परीक्षा नहुँदा आफूहरुमा नैराश्यता उत्पन्न भएको भन्दै विद्यार्थीहरु २१ गतेदेखि हुने भनिएको कक्षा १२ को परीक्षा निर्धारित मितिमा गर्न र अन्य विद्यार्थीको पढाइमा खेलवाड नगर्न गुरुहरुलाई आग्रह गरिरहेका छन् ।
सरकारले बुधवार शिक्षक महासंघसँग गरेको सहमति मान्य नभएको भन्दै विद्यालय कर्मचारीहरुले विमति जनाइसकेका छन् । कर्मचारीहरुको विमति कसरी प्रकट हुने हो र त्यसको सम्बोधन कसरी हुन्छ भन्नेमा सरोकारवालाहरु चिन्तित छन् ।
