काठमाडौं । मनोहरा नगरपालिका र जेनेस सोलुसन प्रा. लि. बीच मंगलबार डिजिटल साक्षरता तथा कार्यस्थल तत्परता अभिवृद्धि गर्ने उद्देश्यले सम्झौता पत्र (एमओयू) मा हस्ताक्षर गरिएको छ। यस सहकार्यअन्तर्गत पाँचवटा १० दिने आईटी तालिम कार्यशाला र तीन महिनाको विस्तारित सिकाइ कार्यक्रम सञ्चालन गरिनेछ।
नगरप्रमुख उपेन्द्र कार्कीको पहल र दूरदृष्टिपूर्ण नेतृत्वका कारण सम्भव बनेको यस साझेदारीमा, नगरपालिकाले सहभागी छनोट र स्थानीय समन्वयमा सहयोग गर्नेछ भने जेनेसले तालिमको डिजाइन, वितरण, सिकाइ प्लेटफर्मको पहुँच र संरचित मूल्याङ्कनमार्फत प्रगति अनुगमन गर्नेछ।
कार्यक्रमको उद्घाटन गर्दै नगरप्रमुख कार्कीले भन्नुभयाे, “हाम्रो नगरपालिकाको युवाशक्ति नै हाम्रो भविष्य हो। आईटीसँग जोडेर युवालाई रोजगारीमुखी बनाउँदै अवसर उनीहरूको आफ्नै नगरपालिकामै ल्याउने हाम्रो लक्ष्य हो।”
उहाँले डिजिटल सीप विकासलाई आफ्नो प्राथमिकतामा राखेको स्पष्ट गर्नुभयाे। सरोकारवालाहरूले उहाँको सक्रिय नेतृत्व र नवीन सोचले कागेश्वोरी-मनोहरा नगरपालिकालाई प्रविधिमुखी र भविष्य-उन्मुख बनाउन ठूलो योगदान पुर्याएको उल्लेख गरे।
जेनेस सोलुसनका सीईओ तथा एडब्ल्यूएस एम्बासडर (यूके एण्ड आई) अञ्जनी फुयालले “काठमाडौंदेखि लन्डनसम्म” आफ्नो यात्राको अनुभव बाँड्दै, डिजिटल शासनको खाडल पूर्ति गर्न सके हजारौं रोजगारी सिर्जना गर्न सकिने र नेपाललाई आफ्नै सर्तमा विश्वसँग जोड्न सकिने बताउनुभयाे।
डोल्मा इम्प्याक्ट फन्डका संस्थापक तथा सीईओ टिम ग्रोचरले, नेपाली स्थानीय फर्महरूले पहिले नै १२ हजारभन्दा बढी प्राविधिक रोजगारी सिर्जना गरिसकेको उल्लेख गर्दै अब निर्णायक रूपमा अघि बढ्नुपर्नेमा जोड दिनुभयाे।
नेपालका लागि बेलायती राजदूत रोब फेनले यस साझेदारीलाई उत्कृष्ट मोडेलको रूपमा प्रस्तुत गर्दै भन्नुभयाे, “एआई, क्लाउड र आधुनिक प्रविधिको उपयोगमार्फत नेपालले आफ्नो विकासलाई तीव्र बनाउन सक्छ र युवामा दक्षता तथा वास्तविक अवसर सिर्जना गर्न सक्छ।”
यो सहकार्यलाई नेपालको डिजिटल रूपान्तरणतर्फको महत्वपूर्ण कदमका रूपमा हेरिएको छ, जसले नगरपालिका ई-शासन परियोजनामा स्नातकहरूको प्रत्यक्ष सहभागिता सुनिश्चित गर्ने र राष्ट्रको डिजिटल क्षमतामा गुणात्मक वृद्धि ल्याउने अपेक्षा गरिएको छ।
