काठमाडौं । फिफा विश्वकप २०२६ ले के के चाहिँ दिएन । नयाँ च्याम्पियन दियो । धेरै कीर्तिमान दियो । फुटबलका लेजेन्डहरूका कीर्तिमान तोडिए, पुरानो लिगेसी धान्न नयाँ पुस्ता जुर्मुरायो ।
त्यसो त सहभागी टिमका हिसाबमा यो संस्करण आफैँमा कीर्तिमानी बन्यो । दर्शकहरूको उपस्थिति, गोलसंख्या, फिफाको आम्दानी र थुप्रै व्यक्तिगत कीर्तिमानहरूले यो विश्वकपलाई विशेष बनाएको छ ।
सर्वकालीन महान् फुटबलर लियोनल मेस्सीले अल्जेरियाविरुद्धको पहिलो खेलमै तीन गोल गरेर सबैभन्दा बढी उमेरमा ह्याट्रिक गर्ने खेलाडीको कीर्तिमान रचे । ३८ वर्षको उमेरमा मेस्सीको आफ्नो विश्वकप करिअरकै त्यो पहिलो ह्याट्रिकसमेत थियो ।
विश्वकप इतिहासमा सर्वाधिक गोल गर्ने खेलाडीको कीर्तिमान पनि यसै प्रतियोगितामा परिवर्तन भयो । लियोनेल मेस्सीले अस्ट्रियाविरुद्ध दुई गोल गर्दै शीर्ष स्थान हासिल गरे । यद्यपि फ्रान्सका किलियन एम्बाप्पेले इङ्ल्यान्डविरुद्ध दुई गोल गर्दै उक्त कीर्तिमान आफ्नो नाममा लेखाए ।
उनले तीन विश्वकपमा कुल २२ गोल गरेका छन् । नकआउट चरणमा सर्वाधिक गोल गर्ने कीर्तिमान पनि एम्बाप्पेले नै बनाए । उनले १२ नकआउट खेल खेल्दा १२ गोल गरेका छन् । यसैपालि क्रिस्टियानो रोनाल्डोले उज्वेकिस्तानविरुद्ध गोल गर्दै ६ वटा विश्वकपमा जाली चुमाउने एक मात्र खेलाडी बने ।
विश्वकप इतिहासकै सबैभन्दा जेठो प्रशिक्षक बन्ने कीर्तिमान डिक एड्भोकाटले बनाए । ७८ वर्षको उमेरमा उनले कुरासाओ टोलीलाई पहिलोपटक विश्वकपमा नेतृत्व गर्दै यो उपलब्धि हासिल गरेका हुन् । ४ सय ४४ वर्ग किलोमिटर क्षेत्रफल रहेको कुरासाओ विश्वकप खेल्ने सबैभन्दा सानो राष्ट्र बन्यो ।
करिब पाँच लाख जनसंख्या रहेको केप भर्डे चाहिँ नकआउट चरणमा पुग्ने सबैभन्दा सानो टोली बन्यो । यस संस्करणमा कुल गोल संख्याले पनि नयाँ कीर्तिमान बनायो । कीर्तिमानी १०४ खेलहरूमा कुल ३०८ गोल भए । प्रतिखेल औसत २.९६ गोल रह्यो । २०२२ मा बनेको १७२ गोलको कीर्तिमान नकआउट चरण सुरु हुनुअघि नै तोडिएको थियो ।
यसैगरी, दर्शक उपस्थितिमा पनि नयाँ इतिहास बन्यो । १९९४ मा अमेरिकामै भएको विश्वकपमा ३५ लाख ८७ हजारभन्दा बढी दर्शक रंगशाला पुगेका थिए । यो कीर्तिमान तोड्दै यसपटक ६० लाखभन्दा बढी दर्शकहरूले रंगशाला पुगेर खेलको आनन्द लिए ।
फिफाले यस विश्वकपबाट करिब १५ अर्ब अमेरिकी डलर आम्दानी हुने घोषणा गरेको छ । जुन प्रतियोगिताअघि अनुमान गरिएको ११ अर्ब डलरभन्दा निकै बढी हो र हालसम्मकै उच्च आय पनि हो ।
