सुनसरी । धरान खेलकुद मञ्चले मङ्सिर २५ गतेदेखि पुस १० गतेसम्म खेलकुद महोत्सव गर्ने भएको छ ।
धरानमा विभिन्न खेलसँग सम्बन्धित खेलकर्मीहरूको साझा संस्था खेलकुद मञ्चले महोत्सवमा नेपालकै पूर्व तथा वर्तमान सर्वश्रेष्ठ खेलाडीहरू र विभिन्न खेलहरूबाट राष्ट्रिय-अन्तर्राष्ट्रिय ओलम्पियनसम्म नेपालकै प्रतिनिधित्व गर्ने खेलाडीहरूलाई विशेष सम्मान गर्ने भएको छ ।
शनिबार पत्रकार सम्मेलन गर्दै मञ्चले विभिन्न लोकप्रिय र व्यावसायिक खेलहरू धरानबाटै सुरू भएको जनाउँदै महोत्सवको प्राङ्गणमा विभिन्न पदकहरू खेल अवधिभर प्रदर्शनी गरिने जनाएको छ । धरान खेलकुदको सहर हो भन्ने सन्देश देश-विदेशलाई दिने र धराने जनता माझ परिचित गराउने उद्देश्यले हुन लागेको महोत्सवमा फुटबल, गल्फ, सुटिङ, बास्केटबल, हक्की, डोरी तान, आर्चरीलगायतको विभिन्न खेलहरूको स्टल राखि प्रमोसन गरिने अध्यक्ष किशोर राईले बताए ।
