काठमाडौं । एन्फा महिला लिगको छनोटमा बुटबल लुम्बिनी एफसी र आरएस रिसोर्ट एन्ड बिच फुटबलले विजयी सुरुआत गरेको छ । सातदोबाटोको एन्फा कम्प्लेक्समा भएको खेलमा समूह 'ए' को आरएसले राप्ती फुटबल क्लबलाई १-० ले हराउँदै तीन अंक जोडेको हो ।
खेलको ३०औं मिनेटमा राप्तीकी मन्जु दोङको प्रहार गोलकिपरले बचाएकी थिइन् । ३७औं मिनेटमा राप्ती १० खेलाडीमा समेटिएको थियो । डिफेन्डर समीक्षा पौडेलले आफ्नो पोस्टअघि विपक्षी फरवार्डलाई हात उठाएपछि दोहोरो पहेलो कार्ड ब्यहोरिन ।
यससँगै राप्ती १० खेलाडीमा समेटिएको हो । पहिलो हाफमा दुवै टिमले गोलका राम्रा अवसर सिर्जना गरेको भए पनि स्कोर गर्न नसक्दा गोलरहित बराबरी बनेको थियो । दोस्रो हाफमा आरएस अग्रता बनाउन सफल भयो। खेलको ५४औं मिनेटमा इशा चौधरीले गोल गरेकी थिइन् ।
खेलको ८३औं मिनेटमा कप्तान रोशनी बाहराको फ्री किक पोस्टको नजिकैबाट बाहिरिएको थियो । १० खेलाडीमा समेटिएको भए पनि राप्तीले बल नियन्त्रण र पासमा राम्रो प्रदर्शन गरेको थियो । यो समूहमा छहारी क्लबको समेत समान तीन अंक छ ।
आजको दोस्रो खेलमा बुटबल लुम्बिनी एफसीले लम्की फुटबल ट्रेनिङ सेन्टरलाई हराएको छ । बुटबल लुम्बिनीले लम्कीलाई १-० गोल अन्तरले हराएको हो । बुटबल लुम्बिनीलाई जित दिलाउन करुणा परियारले निर्णायक गोल गरेकी थिइन् ।
