काठमाडौं । नेपाली महिला फुटबललाई विश्वमा प्रतिस्पर्धी बनाउन व्यावसायिक फुटबलको गुणात्मक विकास चाहिन्छ ।
त्यसका लागि बलियो घरेलु संरचना र व्यावसायिक क्लबहरूको सहभागिता पहिलो सर्त हो । तर विडम्बना, शीर्ष डिभिजन 'सहिद स्मारक ए डिभिजन लिग' खेल्ने अधिकांश क्लबले अझै महिला टोली नै बनाएका छैनन् ।
यो अवस्थामा महिला टोली स्थापना गर्ने थोरै क्लबमध्ये चर्च ब्वाइज युनाइटेड प्रेरणादायी बनेको छ । चर्च ब्वाइजले दीर्घकालीन लक्ष्यसहित महिला टोली बनाएर प्रतिस्पर्धामा उतारेको छ ।
युवाहरूको विदेश मोहकाबीच चर्च ब्वाइजलाई महिला टिम गठन गर्न सहज थिएन । तर क्लबले देशभर प्रतिभा खोज्ने र बलियो महिला टिम बनाउने योजना बनायो । त्यसैअनुसार क्लबले विभिन्न प्रदेशबाट खेलाडी छनोट गरेर टोली बनाएको हो ।
विभागीय टिमहरूले महिला फुटबलमा वर्चस्व जमाइरहेका बेला चर्च ब्वाइजले नयाँ महिला टोली गठन गरेको हो । चर्चले अहिले महिला 'ए' डिभिजन लिगका लागि हुने छनोट प्रतियोगितामा भाग लिने तयारी गर्दैछ ।
छनोटमा १४ टिम सहभागी हुँदैछन् । तीमध्ये शीर्ष ५ टिम 'ए' डिभिजनमा छानिने छन् । चर्चको तत्कालीन लक्ष्य शीर्ष लिगमा प्रतिस्पर्धा गर्नु भए पनि दीर्घकालीन उद्देश्य राष्ट्रिय टोलीका लागि नयाँ प्रतिभा उत्पादन गर्नु हो ।
नेपालको महिला फुटबलमा विभागीय टोली एपीएफ, नेपाल पुलिस र त्रिभुवन आर्मी क्लबको वर्चश्व छ । तर अब चर्चले पनि १५ देखि २४ वर्षसम्मका खेलाडी छनोट गरेर प्रतिस्पर्धी टोली गठन गरेको हो ।
टोलीलाई बलियो बनाउन हालै यू-२० नेपाली महिला राष्ट्रिय टिमका चार खेलाडी अनुबन्ध गरिएको छ । गोलकिपर लिला जोशी, सरिता नाथ, सीता रोकाया र वर्षा ओली जस्ता अनुभवी खेलाडी समेटेको क्लबले अब सशक्त टोली गठन भएको जनाएको छ ।
महिला खेलाडीको क्षमता सावित्रा भण्डारी साम्बा, पि्रती राई र रेखा पौडेल जस्ता खेलाडीले अन्तर्राष्ट्रिय लिगमा पुगेर पुष्टि गरिसकेका छन् । उनीहरू व्यावसायीक फुटबल खेल्न विभिन्न देश पुगेका छन् । तर राष्ट्रिय महिला टोलीले भने अहिलेसम्म अन्तर्राष्ट्रिय प्रतियोगिता जित्न सकेको छैन ।
यो अवस्थामा 'ए' डिभिजनका क्लब चर्च बोइजले गठन गरेको महिला टोलीले राष्ट्रिय टिमलाई पनि थप बलियो बनाउन सहयोग पुग्न सक्छ । योसँगै शीर्ष डिभिजनका सबै क्लबले महिला फुटबलमा पनि ध्यान दिने हो भने नेपाली महिला फुटबल थप व्यावसायीक बन्न सक्छ ।
