काठमाडौं । अल इत्तिहाद साउदी प्रो लिगको उपाधि नजिक पुगेको छ । गएराति भएको खेलमा इत्तिहादले अल नासारमाथि ३-२ गोलको पुनरागमन जित हात पारेको हो । शीर्ष स्थानको इत्तिहाद अन्तिम समयमा दश खेलाडीमा समेटिएको थियो ।
रियाद स्थित अल अवाल पार्कमा नासारले सुरूवाती अग्रता जोगाउन सकेन । खेल सुरू भएको तेस्रो मिनेटमै साडियो मानेले गोल गरेपछि नासार १-० ले अघि रहेको थियो । ३७औं मिनेटमा सेनेगल अन्तराष्ट्रियकै सहयोगमा एइमन याहाले गोल गरे ।
पहिलो हाफमा २-० गोलले पछि परेको इत्तिहाद ब्रेकपछि उत्कृष्ट देखियो । ४९औं मिनेटमा करिम बेन्जिमाले गोल गर्दै नासारसंगको दुरी कम गरेका थिए । ५२औं मिनेटमा एंगोलो कान्टेले बराबरी गोल फर्काए । इन्जुरी समयमा हुसेम औवारले गोल गरेपछि नासार स्तब्ध भएको हो । अन्तिममा मौसा डिबाय रातो कार्ड पाउँदै मैदान बाहिरिएका थिए । जितपछि इत्तिहादले अंक तालिकामा ६ अंकको अग्रता लिएको छ ।
शीर्ष स्थानमा रहेको उसको ३० खेलबाट ७१ अंक छ । दोस्रो स्थानको अल हिलालको ६५ अंक छ । नासार ६० अंक सहित चौथों स्थानमा छ । यो हारले नासारलाई अर्को सिजनको एशीयन च्याम्पियन्स लिग एलिटमा छनौट हुन कठिन भएको छ ।
अल आलीले यो सिजनको उपाधि जितेपछि अब साउदी प्रो लिगबाट मात्र दुई टिम छनौट हुनेछन् । अर्को खेलमा अल हिलालले अल राइदमाथि ५-३ गोलको जित हात पार्यो ।
उसका लागि सलिम अल्दासरीले ह्याट्रिक गरे । ३२औं मिनेटमा पाहुना टिमका लागि अलेक्जान्दर मिट्रोभिचले गोल गरेका थिए । ४१औं मिनेटमा सलिमले हिलमलको अग्रता दोब्बर बनाए । इन्जुरी समयमा घरेलु टिम राइदका करिम एलले गोल गर्दै दुरी कम गरे ।
५९औं मिनेटमा सलिमले ब्यक्तिगत दोस्रो गोल गरे । ६८औं मिनेटमा करिमले गोल गरेपछि खेल रोमाञ्चक बनेको थियो । ६६औं मिनेटमा माल्कमले गोल गरेपछि अल हिलाल पुन अघि रह्यो । ७८औं मिनेटमा सलिमले ह्याट्रिक पुरा गरे । इन्जुरी समयमा सलेह अल अमिरीले पेनाल्टीमा गोल गरेपनि हिलालको जितमा अरि परेन।
