काठमाडौं । नेपाल प्रिमियर लिग (एनपीएल) अन्तर्गत आज हुने दोस्रो खेलमा पोखरा एभेन्जर्सले चितवन राइनोजसँग प्रतिस्पर्धा गर्दै छ । यो खेल दिउँसो एक बजेबाट सुरू हुनेछ ।
चितवनले जारी प्रतियोगितामा सुखद् सुरूआत गरिसकेको छ । हिजो भएको खेलमा कुशल मल्लको कप्तानीमा रहेको चितवनले काठमान्डु गुर्खाजलाई पाँच विकेटले पराजित गरेको हो । पाकिस्तानी पेस बलर सोहेब तन्विरले पाँच विकेट लिएपछि चितवनले गुर्खाजलाई एक सय ११ रनमा रोकेको थियो । जवाफमा उसले १७ बल बाँकी छँदै लक्ष्य पूरा गर्यो । अनुभवी शरद भेषावकर र युवा खेलाडी सन्तोष कार्की अन्तिम समयसम्म क्रिजमा रहेका थिए । चितवन आज पनि सोही लयलाई निरन्तरता दिँदै दुई अंक जोड्ने लक्ष्यमा हुनेछ । काठमान्डु विरुद्ध बिहानीको खेलमा चितवनलाई टसले पनि साथ दिएको थियो ।
यता कुशल भुर्तेलको नेृतत्वमा रहेको पोखरा पहिलो खेलमा नै आफूलाई उपाधिको दावेदारका रूपमा प्रस्तुत गर्न चाहन्छ । सागर ढकाल सम्मिलत पोखरलाई आन्द्रियस गस, बास डि लिडको पनि साथ रहनेछ । त्रितराज दास, नारायन जोशी, किरण ठगुन्ना, विपीन खत्री पनि पोखरामा नै छन् ।
