काठमाडौं । नेपाली राष्ट्रिय महिला फुटबल टिमले खेल्ने फोर नेसन्स कपको खेल तालिका सार्वजनिक भएको छ । घरेलु टिम नेपालले आफ्नो पहिलो खेलमा कीर्गिस्तानसँग प्रतिस्पर्धा गर्नेछ ।
अखिल नेपाल फुटवल संघले आज आगामी फागुन ५ गतेदेखि हुने प्रतियोगिताको तालिका सार्वजनिक गरेको हो । प्रतियोगतामा नेपाल र कीर्गिस्तानसहित लेबनान र म्यानमार सहभागी हुने छन् ।
उद्घाटन खेल म्यानमार र लेबनानबीच हुनेछ । यो खेल दिउँसो साढे एक बजे हुनेछ । नेपाल र कीर्गिस्तान बीचको खेल साँझ साढे ५ बजे सुरु हुनेछ ।
नेपालले दोस्रो खेल फागुन ८ गते लेबनान र लिगको अन्तिम खेल ११ गते म्यानमारसँग खेल्ने तालिका छ । लिग विजेता र उपविजेता फाइनल प्रवेश गर्नेछन् । उपाधिका लागि फागुन १४ गते प्रतिस्पर्धा हुनेछ । सबै खेल त्रिपुरेश्वरस्थित दशरथ रंगशालामा हुनेछन् ।
महिला टिमले गत कात्तिकमा काठमाडौंमा भएको साफ च्याम्पियनसिप पछि पहिलो पटक अन्तर्राष्ट्रिय खेल खेल्न लागेको हो । साफमा नेपाल उपविजेता बनेको थियो । एन्फाले फेब्रुअरीको फिफा विन्डोको खेल खेलाउन लागेको हो ।
