काठमाडौं । महिला च्याम्पियन्स लिग अन्तर्गत गएराति भएको खेलमा भने म्यानचेस्टर सिटीले जित हात पारेको छ । टेले-टू एरिनामा भएको खेलमा सिटीले हामारबी क्लबविरुद्ध २-१ को जित हात पारेको हो ।
सिटीलाई जित दिलाउनको लागि खादिजा शले दुवै गोल गरिन् । खेलेको ३१ औं मिनेटमा हासेगावाले मिलाइ दिएको पासमा खादिजाले गोल गर्दै सिटीलाई अग्रता दिलाएकी थिइन्।
यससँगै पहिलो हाफमा सिटी एक गोलले अघि रह्यो । दोस्रो हाफको ४८ औं मिनेटमा गोल फर्काएर खेल बराबरीमा ल्याएको थियो । जे ब्लाकस्टाडले दिएको पासमा एलेना वेङ्गेरिमले गोल गरेपछि खेल एक-एक गोलको अवस्थामा पुगेको हो । यता खेलको ५२ औं मिनेटमा नै सिटीले पुनरागमन गरेको थियो ।
यपटक खाजिलाले जे पार्कको पासमा गोल गरेकी हुन् । यो जितसँगै समूहको शीर्ष स्थानमा रहँदै सिटीले नकआउट चरणमा स्थान पक्का गरेको हो । समूह डी कै अर्को खेलमा भने गएराति नै बार्सिलोनाले सेन्ट पोल्टेनलाई एक एक गोलको बराबरीको अवस्थामा रोकेको छ ।
यसैगरी महिला च्याम्पियन्स लिगमा गएराति लियोनले रोमालाई ४-१ गोलले हराएको छ भने चेल्सीले सेल्टिकमाथि ३-० को विजय हासिल गरेको छ ।
