पोखरा । लामाचौर कप भलिबल प्रतियोगितामा पुरुषतर्फको उपाधि विभागीय टिम नेपाल पुलिस क्लबले जितेको छ । हिजो दिनको प्रकाश समाप्त भएपछि पहिलो सेटपछिको खेल आजलाई स्थगित गरिएको थियो ।
हिजै भएको पहिलो सेटमा पुलिस २६-१६ ले विजयी भएको थियो । त्यसपछि आज विहान भएको खेलमा दोस्रो सेटमा पुलिसले जितको लय कायम राख्न सकेन । यसपटक एपीएफ २१-२५ ले विजयी भयो । खेलमा कमब्याक गरेको पुलिसले तेस्रो सेट २५-१९ ले जितेको भए पनि चौथो सेटमा फेरी एपीएफ हाबी भयो ।
चौथो सेटमा एपीएफले २२-२५ को जित दर्ता गर्यो । २-२ को बराबरी भएपछि पाँचौ सेटमा पुगेको खेलमा पुलिसले १६-१४ को जित दर्ता गर्यो र उपाधि जित्यो । हिजो भएको महिलातर्फको फाइनलमा एपीएफले न्यू-डायमन्डलाई हराएर उपाधि जितेको थयो । विजेता पुलिसले एक लाख ५० हजार र उपविजेता एपीएफले एक लाख पुरस्कार जितेको छ ।
पुरुषतर्फ पुलिसका सन्जुविक्रम शाह र महिलातर्फ एपीएफकी पूजा चौधरी सर्वोत्कृष्ट खेलाडी घोषित भइन् । उनीहरुले जनही १० हजार पुरस्कार पाए । पुरुषतर्फको व्यक्तिगत अवार्डमा पनि पुलिस हावी रह्यो । महिलातर्फ एपीएफका तीन खेलाडी विधागत रुपमा उत्कृष्ट बन्दा न्यू-डायमन्डकी सुमित्रा रेग्मी उत्कृष्ट ब्लकर र सलिना बुढामगर उत्कृष्ट स्पाइकर बनिन् ।
