काठमाडौं । पेरिस ओलम्पिक २०२४ अन्तर्गत छैटौँ दिनको समाप्तिमा चीन पदक तालिकाको शीर्ष स्थानमा कायमै रहेको छ ।
चीनले ११ स्वर्ण ७ रजत ६ कांस्य सहित कुल २४ पदक जितेको छ । पाँचौँ दिनको अन्त्यमा सातौँ स्थानमा रहेको अमेरिकाले छैटौँ दिन भने पदक तालिकामा ठुलो छलाङ मारेको छ । अमेरिका ९ स्वर्ण १५ रजत र १३ कांस्य सहित कुल ३७ पदक जित्दै दोस्रो स्थानमा उक्लिएको छ । अमेरिकाले छैटौँ दिन रोइङ, आर्टिस्टिक जिम्नास्टिक्स, फेन्सिङ र स्विमिङमा स्वर्ण पदक जित्न सफल भयो ।
आयोजक फ्रान्स तालिकामा १ स्थान तल झरेर तेस्रो स्थानमा पुगेको छ । उसले ८ स्वर्ण ११ रजत र ८ कांस्य सहित कुल २७ पदक जितेको छ । छैटौँ दिन फ्रान्सले १ रजत मात्र जित्न सक्यो । अस्ट्रेलिया ८ स्वर्ण, ६ रजत र ४ कांस्य सहित कुल १८ पदक जितेर चौथो स्थानमा यथावत् । जापान ८ स्वर्ण, ३ रजत र ५ कांस्य सहित १६ पदक जितेर पाँचौँ स्थानमा छ । ग्रेट ब्रिटेन, दक्षिण कोरिया र इटाली क्रमशः छैटौँ, सातौँ र आठौँ स्थानमा छन् ।
सहभागी २ सय ६ देश मध्ये २९ देशले कम्तीमा १ स्वर्णपदक जितेका छन् भने ५० देशले पदकको खाता खोलेका छन् । पेरिस ओलम्पिक २०२४ अन्तर्गत सातौँ दिन २६ स्वर्ण पदकका लागी प्रतिस्पर्धा हुनेछ ।