काठमाडौं । तीन महिनापछि हुन लागेको पेरिस ओलम्पिकका लागि बैजनी रङको एथ्लेटिक्स ट्रयाक राखिने भएको छ । परम्परागत रातो र गुलाबी रंगशालाभन्दा फरक बैजनी रंगको ट्रयाक राख्न लागिएको हो ।
पेरिसको स्टेड डी फ्रान्स रंगशालामा एथ्लेटिक्सको ट्रयाक राख्ने काम अहिले भइरहेको छ । पेरिसको ग्राफिक चार्टसँग मिलाउन बैजनी रंगको बनाइएको हो । यो ट्रयाक नयाँ रेकर्ड बनाउन सहयोगी हुने आयोजकको दाबी छ ।
यो ट्रयाक सन् २०२१ को टोकियो ओलम्पिकमा प्रयोग गरिएको ट्रयाकजस्तै रहे पनि थोरै परिवर्तन गरिएको छ । यसलाई इटालीको मोन्डो कम्पनीले बनाएको हो ।
टोकियो ओलम्पिकमा तीन विधामा विश्व कीर्तिमान बनेका थिए । डेकाथलनका पूर्व युरोपेली च्याम्पियन ब्लोन्डेलले सामान्य रुपमा प्रयोग गरिने रङभन्दा फरक प्रयोग गर्दा उत्साही भएको प्रतिक्रिया दिएका छन् । जुन १ तारिखसम्ममा यो ट्रयाक पूरा गर्ने लक्ष्य रहेको छ ।
