बाँके । नेपालगन्जमा आज भएको आठौँ म्याराथनले पश्चिम नेपालमा खेल पर्यटनको विकासको ढोका नै खोलिदिएको छ । यसले नेपालगन्जलाई अन्तर्राष्ट्रिय क्षेत्रमा परिचित गराउन सहयोग पुगेको छ । एसोसिएसन अफ इन्टरनेसनल म्याराथन एन्ड डिस्ट्यान्स रनिङ -एम्सले नेपालगन्ज म्याराथनलाई रुटको अनुमति दिएको थियो ।
काठमाडौं र पोखरा म्याराथनको तुलनामा नेपालगन्ज म्याराथनको ४२ किलोमिटर मार्ग सहज थियो । समतल भूमिमा आफ्नो प्रतिभा देखाउँदा खेलाडी जति उत्साहित थिए त्यति नै खेल प्रेमी हौसिएका थिए ।
नेपालगन्जमा पहिलो पटक अन्तर्राष्ट्रिय धावकले म्याराथन दौडिने र रुटको अवस्था बुझ्ने अवसर पाए । यस पटक ४ जना विदेशी खेलाडीसमेत नेपालगन्ज म्याराथन सहभागी भए ।
नेपाली खेलकुदमा दशकौँ अगाडिदेखि म्याराथनका विभिन्न प्रतिस्पर्धा भएको पाइन्छ। तर, ती सबै आधिकारिक थिएनन् । किनकि ती न एम्सका सदस्य थिए न त आधिकारिक रूपमा रुट नै नापिएको थियो। तर नेपालगन्ज म्याराथनको यो आठौँ संस्करण ऐतिहासिक बन्न पुग्यो ।
आठौँ म्याराथनले नेपाली खेलकुदमा ठुलो अवसर तयार पारेको छ । योसँगै चुनौती पनि थपेको छ । किनकि नेपालगन्ज म्याराथन अब घरेलु खेलाडीमै मात्र सीमित हुने छैन । ख्याति कमाएका र नाम चलेका धावकले पनि नेपालगन्ज म्याराथनलाई आफ्नो गन्तव्य बनाउन सक्ने भएकाले आयोजक सामु चुनौतीका चाङ नै चाङ देखिएका छन् ।
