भक्तपुर । भक्तपुरका नेवार समुदायले आज सकिमना पुन्ही मनाएका छन् ।
कार्तिक शुक्ल पूर्णिमाको दिन नेवार समुदायले आज बिहानदेखि भगवान नारायण र शिवको पूजा आरधना गर्दै अन्न र गेडागुडीबाट विभिन्न मठमन्दिर तथा देवदेवीका आकृति बनाएर यो पर्व मनाएका हुन् ।
यसक्रममा टोल टोलमा रहेको स्थानीय दाफ भजन समूहले भुटेका मकै, भटमास, गहुँलगायत गेडागुडीमार्फत चित्रकला प्रदर्शनी गरेका छन् । स्थानीय भाषामा हलिमली भनिने यस पर्वमा पिँडालु सखरखण्ड खाने चलन छ ।
प्रदर्शनीमा राखिएका चित्रकलामा पूजा गरि भजन गाइन्छ । विद्यालयको स्थानीय पाठ्यक्रमा समेत यो पर्वको विषयमा पढाइ हुने भएकाले विद्यालयहरूले विद्यार्थीलाई अन्नबाट बनेका देवदेवताका चित्रकला अवलोकन समेत गराएका थिए ।
यो दिन भक्तपुरका भक्तजनहरु आशापुरी महादेव, यातु महादेव, केदारनाथको शिर डोलेश्वर महादेव,चाँगुनारायण, इचंगुनारायण लगायतका मन्दिरमा गएर दर्शन गर्ने चलन छ ।
