सिरहा । जनता समाजवादी पार्टी, नेपालका अध्यक्ष एवं पूर्वउपप्रधानमन्त्री उपेन्द्र यादवले संविधान संशोधन नगरी चुनावमा जाँदा मुलुकले निकास नपाउने बताउनुभएकाे छ ।
सिरहाको गोलबजारमा सोमबार आयोजित डोटिम परिसंघको कार्यक्रमलाई सम्बोधन गर्दै अध्यक्ष यादवले यस्तो बताउनुभएकाे हाे । अहिलेको संविधान आफ्नै देशका जनतालाई गोली दागेर जबर्जस्ती जारी गरिएको, यसले मुलुकका सबै जनतालाई नसमेटेको र यसैकारण मुलुक अस्थिर रहँदै आएको उहाँको भनाइ छ । 'यो संविधान जारी गर्ने बेला लाखौं मधेशी जनता सडकमा ब्ल्याकआउट गर्दै थिए, तर गोली दागेर संविधान जारी गरियो,' उहाँले भन्नुभयाे, 'यस्तो संविधान जनतालाई स्वीकार्य हुँदैन ।'
अध्यक्ष यादवले संविधानको संशोधन र परिमार्जन मात्र नभइ आवश्यकताका आधारमा पुनर्लेखन नै गर्नुपर्ने बताउनुभयाे । तर, संविधानको उपचार नगरी अहिलेकै अवस्थामा चुनावमा गए देशले निकास नपाउने उहाँको जिकिर छ । 'हामी चुनावमा त जाउँला,' उहाँले भन्नुभयाे, 'तर, यसरी मुलुकका समस्या ज्यूँकात्यूँ रहन्छन्, कांग्रेस कम्युनिष्टले लुट मचाइरहन्छ ।'
संविधानमा सबै समुदायलाई जनसंख्याका आधारमा सम्बोधन गर्नुपर्ने उहाँकाे भनाइ थियाे । 'राजनीतिक वा प्रशासनिक क्षेत्रमा होस्, सेवा वा अवसर प्राप्तिमा होस्, गैरबराबरी अन्त्य गर्नुपर्छ,' यादवले भन्नुभयाे, 'जसको जति जनसंख्या छ, हरेक क्षेत्रमा त्यति हिस्सा मिल्नुपर्यो ।'
