काठमाडौै । एमालेको अधिकांश पदाधिकारीमा समेत ओली पक्षकै वर्चस्व कायम भएको छ । अध्यक्षमा पराजित ईश्वर पोखरेल समूहबाट पदाधिकारीमा दुईजनाले मात्रै जितेका छन् । सचिवमा त झन् एकलौटी नै भएको छ । माओवादी पृष्ठभुमिबाट आएका नेताहरुलाई एमाले प्रतिनिधिले लोकप्रिय मत दिँदा ओलीकै विश्वासपात्र गुरु बराल र विष्णु रिमाल भने पराजित भएका छन् ।
एमालेका पाँच उपाध्यक्ष मध्ये ईश्वर पोखरेल समूहबाट जितेको गोकर्ण विष्ट मात्रै हो । बाँकी चार मध्ये सबैभन्दा लोकप्रिय मतसहित पृथ्वीसुब्बा गुरुङ, विष्णु पौडेल, रामबहादुर थापा बादल र रघुजी पन्त विजयी हुनुभएको छ । गुरुङ जेनजी आन्दोलनअघि सञ्चारमन्त्री तथा एमालेका निवर्तमान उपमहासचिव र गण्डकीका पूर्वमुख्यमन्त्री भैसक्नुभएको छ ।
यसैगरी विष्णु पौडेल यसअघि पनि उपाध्यक्ष हुनुहुन्थ्यो । यसअघि एमालेको सरकार छँदा उहाँ उपप्रधान तथा अर्थमन्त्री र एमाले तथा माओवादी मिलेर नेकपा बन्दा पार्टी महासचिव हुनुहुन्थ्यो ।
तेश्रो लोकप्रिय मतसहित उपाध्यक्ष निर्वाचित रामबहादुर थापाले माओवादी पृष्ठभूमिमा नेकपामा सामेल हुँदै एमालेमा यसअघि नै उपाध्यक्ष हुनुहुन्थ्यो ।
यसअघि सर्वाधिक मध्ये धेरै मत ल्याएर दुई कार्यकाल सचिव रहेका गोकर्ण विष्ट ईश्वर पोखरेल समूहबाट उपाध्यक्षमा निर्वाचित हुनुभएको हो । भद्र र विकासप्रेमी नेताका रूपमा चिनिने विष्ट २०६८ सालमा ऊर्जामन्त्री हुँदा विद्युत महसुल नतिर्नेहरुको लाइन काटेर चर्चित बन्नुभएको थियो ।
रघु जी पन्त दुबै समूहको उपाध्यक्षको उम्मेदवार हुनुहुन्थ्यो । यसअघि पार्टीको पदाधिकारी नभै पन्तले ११ औं महाधिवेशनबाट उपाध्यक्षमा बाजी मार्नुभएको छ । महासचिवका आकांक्षी प्रदिप ज्ञवालीले उपाध्यक्ष अस्वीकार गर्दा पन्तको बाटो सहज भएको हो ।
एमाले अध्यक्षपछि सबैभन्दा शक्तिशाली र कार्यकारी पद महासचिवमा भने ओलीकै विश्वासपात्र शंकर पोखरेल निर्वाचित हुनुभएको छ । पोखरेल यसअघि पनि महासचिव हुनुहुन्थ्यो । २०६५ सचिवमा निर्वाचित पोखरेल २०७१ सालको नवौँ महाधिवेशनमा भने उपमहासचिवमा पराजित हुनुभएको थियो ।
तीन उपमहासचिव मध्ये दुई जना ओली पक्षबाट र योगेश भट्टराई ईश्वर पोखरेल समूहबाट निर्वाचित हुनुभएको छ ।
माओवादी पृष्ठभूमिबाट एमालेमा आएका लेखराज भट्टले लोकप्रिय मतसहित जित हासिल गरेर पार्टीभित्र सर्वस्वीकार्य’ भएको सन्देश दिनुभएको छ ।
अर्का उपमहासचिवमा मधेश प्रदेशमा बलियो पकट भएका नेता रघुविर महासेठ निर्वाचित हुनुभएको छ । यसअघि सचिव रहेका महासेठ एमालेका १९ पदाधिकारी मध्ये एक मात्र मधेशी मुलका नेता हुनुहुन्छ।
पार्टी रुपान्तरण र आन्तरिक लोकतन्त्रको आवाज उठाउँदै अध्यक्ष ओलीको खरो आलोचना गर्दै आउनुभएका योगेश भट्टराई पनि उपमहासचिव निर्वाचित हुनुभयो । २०५१ सालमा अनेरास्ववियूको अध्यक्ष रहेका भट्टराई यसअघि पार्टीको सचिव हुनुहुन्थ्यो ।
एमालेका ९ जना सचिव भने सबै ओली समूहबाट विजयी भएका छन् । सचिवमा सबैभन्दा बढी मत महेश बस्नेतलाई प्राप्त भएको छ । ११ महाधिवेशनबाट एमालेको पदाधिकारीमा एक जना मात्रै महिलाका रुपमा पद्माकुमारी अर्यालले चुनाव जित्दा छविलाल विश्वकर्मा पनि दलित समुदायको प्रतिनिधित्व गर्दै सचिव बन्नुभयो । शेरधन राई, हिक्मतकुमार कार्की, खगराज अधिकारी प्रदेश सरकारमा पूर्वमुख्यमन्त्री भैसकेका नेताहरु हुन् । कर्णालीले पहिलो पटक पार्टी पदाधिकारीका रुपमा यामलाल कंडेल सचिव निर्वाचित हुनुभएको छ । उहाँ कर्णाली प्रदेशको मुख्यमन्त्री हुनुहुन्छ । अध्यक्ष ओलीका रोजाइका पात्र राजन भट्टराई र भानुभक्त ढकाल पनि सचिवमा विजयी हुनुभएको छ ।
ओली र पोखरेल समूह प्यानल नै बनाएर चुनावमा उत्रँदा एमालेको ११ महाधिवेशनले लोकतान्त्रिक परिपाटीलाई भने अंगिकार गर्यो । तर अध्यक्षदेखि अधिकांश पदाधिकारीमा ६० वर्ष माथिकै नेताहरुको वर्चश्व देखिएको छ।
